“Бунга эҳтиёж йўқ”. Комилов АҚШ ҳарбийларини Ўзбекистонга жойлаштириш ҳақида 

north_east

“Толибон” ғоялари Ўзбекистонга ёйилиши мумкинми? Сўз Комиловга

Ўзбекистон АҚШ ҳарбийларини ўз ҳудудига жойлаштиришга эҳтиёж сезмаяпти, Вашингтон бу позицияни тан олади. Бу ҳақда Ўзбекистон Ташқи ишлари вазири Абдулазиз Комилов бугун, 22 октябрь куни бир қатор рус ОАВ вакиллари билан суҳбатда таъкидлади.

Қайд этиш керакки, бугун, 22 октябрь куни Ташқи ишлар вазири бир қатор рус ОАВ, жумладан “Первый канал”, “Россия 24”, НТВ, ТАСС, “Коммерсантъ” ва “Комсомольская правда” каби нашр ҳамда телеканаллар вакиллари билан Тошкентда ТИВ биносида матбуот анжумани ўтказди ва уларни қизиқтирган саволларга 2 соатдан ортиқ жавоб берди. 

Абдулазиз Комилов АҚШ ҳарбийларини Ўзбекистон ҳудудига жойлаштириш эҳтимоли ҳақидаги саволга қуйидагича жавоб берди:

“Бугунги кунда ҳақиқат шуки, бунга эҳтиёж йўқ”.

Ташқи ишлар вазирининг қўшимча қилишича, 2002 йилда имзоланган Ўзбекистон ва АҚШ ўртасидаги стратегик шериклик тўғрисидаги декларация ҳамда 2018 йилда Президент Шавкат Мирзиёевнинг Вашингтонга ташрифидан кейин қабул қилинган қўшма баёнотда ўзаро ҳамкорликнинг стратегик йўналишлари билан биргаликда, ўзаро муносабатларнинг чегаралари ҳам белгилаб олинган.

“Кўп йиллик сиёсий маслаҳатлашувлар давомида, кўплаб жиддий учрашувлар вақтида америкаликларга маълумот берилди ва улар бунинг деярли барчасини тушунишади, сиз айтаётган нарсалар Ўзбекистон учун мутлақо номақбул эканлигини тан олишади. Улар (ушбу мавзу – таҳр.) амалда кўтарилмайди ва муҳокама қилинмайди”, дея таъкидлаган ТИВ раҳбари.

Эслатиб ўтамиз, Американинг “Politico” нашри Пентагон расмийлари Ўзбекистонга аксилтеррор кучларини жойлашриш бўйича музокара ўтказиши ҳақида хабар тарқатганди. Бунга жавобан Ўзбекистон Мудофаа вазирлиги Пентагон вакилларининг республикага ташрифи бўйича расмий сўров олмаганликлари ҳақида хабар берганди.

Шунингдек, Ташқи ишлар вазири Абдулазиз Комилов АҚШ ҳарбий кучларини Ўзбекистонга жойлаштириш муҳокама мавзуси эмаслигини маълум қилди.

Бироқ, кейинроқ АҚШнинг Ўзбекистондаги муҳтор элчиси Даниел Розенблум ўзининг Twitter’даги саҳифасида Қўшма Штатлар Мудофаа вазирининг махсус операциялар ва паст даражадаги низолар бўйича ёрдамчиси Кристофер Майер Ўзбекистонда чегара хавфсизлиги масалалари бўйича музокаралар ўтказганини маълум қилди. 

Шу ўринда, 2012 йилда қабул қилинган Ташқи сиёсий фаолият концепцияси ва мудофаа тўғрисидаги қонунни эслаб ўтиш керак. Бу икки муҳим ҳужжатга кўра, Ўзбекистон Республикаси ҳудудида хорижий ҳарбий базаларнинг жойлаштирилиши мумкин эмас. Бундан ташқари, Республика ҳеч қандай ҳарбий-сиёсий блокларга ҳам қўшила олмайди.