Бухорода университет битирувчиларига нега диплом берилмаяпти?

Бугун, 13 май куни QALAMPIR.UZ’га Бухоро давлат техника университетининг кечки таълим йўналишида таҳсил олган ва ўқишни 2025 йил январь ойида якунлаган талабалардан бири мурожаат қилди. Унинг сўзларига кўра, ўқиш 2025 йил январда якунланган, битирув имтиҳони эса 2025 йил 14 март куни бўлиб ўтган. Аммо шу кунгача на диплом, на диплом иловаси тақдим этилган.

Унинг таъкидлашича, деканатга мурожаат қилишса, ходимлар бўлимига йўналтиришади, у ерга боришса, яна деканатга жўнатишади – натижада талабалар сарсон бўлиб қолган. Шу сабабли битирувчилар ишга жойлаша олмаяпти.

“Бу орада биз ҳеч қандай ҳужжат ололмадик. Ишга ҳужжат топширмоқчи бўлсак, диплом талаб қилишмоқда. Ҳеч бўлмаганда дипломнинг электрон нусхаси тақдим этилса, ишга жойлашишимиз осонлашган бўларди”, дейди мурожаатчи.

Ҳолатга аниқлик киритиш мақсадида QALAMPIR.UZ Олий таълим, фан ва инновациялар вазирлиги матбуот котиби Назокат Абдуқундузова билан боғланди. Унинг маълум қилишича, Бухоро муҳандислик-технология институти ҳамда Бухоро табиий ресурсларни бошқариш институти негизида Бухоро давлат техника университети янги ташкил этилгани учун дипломларни топширишда кечикиш ҳолатлари юз берган. Ушбу муаммо шу йилнинг 20 майига қадар ҳал этилиши кутилмоқда.

“Бухоро давлат техника университети янги ташкил этилгани муносабати билан диплом беришда кечикишлар юз берган. Жорий йил 20 майига қадар битирувчиларга дипломлар тақдим этилади”, деди матбуот котиби.

Эслатиб ўтамиз, аввалроқ ушбу университетда бирин-кетин икки талаба ўз жонига қасд қилгани ортидан жамоатчиликда кенг муҳокамага сабаб бўлган эди.