Бухорода тарихий тангалар ва кўкрак нишонларини Россияга олиб кетаётган шахс ушланди

Бухоро аэропортида қимматбаҳо металлардан ясалган заргарлик буюмлари ҳамда маданий бойликларни ноқонуний равишда хорижга олиб чиқмоқчи бўлган шахс ушланди. Бу ҳақда вилоят божхона бошқармаси матбуот хизмати хабар берди.

Қайд этилишича, “Бухоро-Санкт-Петербург” йўналишидаги авиарейс орқали хорижга учиб кетмоқчи бўлган фуқаро умумий қиймати 165 миллион сўм бўлган заргарлик буюмларини божхона ходимининг оғзаки сўровида маълум қилмаган ва йўловчи божхона декларациясида қайд этмаган.

Натижада олиб чиқиш меъёридан ортиқча бўлган жами 37 дона, оғирлиги 226,04 грамм бўлган заргарлик буюмлари ҳамда тарихий аҳамиятга эга 16 дона кўкрак нишонлари ва тангалар аниқланиб, ашёвий далил сифатида вақтинча сақловга олинган.

Ҳозирда мазкур ҳолат юзасидан божхона органлари томонидан тегишли тартибда иш олиб борилмоқда.

Эслатиб ўтамиз, аввалроқ Бухоро вилоятида қадимий нумизматика буюмларини мамлакат ҳудудидан олиб чиқмоқчи бўлган шахс ушланганди.