Бугундан АҚШ визаси талабгорларининг тармоқдаги саҳифалари текширилади 

Эндиликда F, M ёки J ноиммиграцион визасига мурожаат этувчи барча шахсларнинг барча ижтимоий тармоқ аккаунтларидаги махфийлик созламаларини “оммавий” ҳолатга ўтказишлари сўралади. Бу ҳақда АҚШнинг Ўзбекистондаги элчихонаси огоҳлантириш билан чиқди.

Қайд этилишича, бу АҚШ қонунчилигига мувофиқ равишда, талабгорларнинг шахсини ва Қўшма Штатларга кириш ҳуқуқини аниқлаш учун зарур бўлган текширувни осонлаштириш мақсадида амалга оширилмоқда.

“Биз виза мурожаатларини текшириш ва саралаш жараёнида АҚШ ҳудудига кириши мумкин бўлмаган, жумладан, АҚШ миллий хавфсизлигига таҳдид солувчи шахсларни аниқлаш учун барча мавжуд маълумотдан фойдаланамиз”, дейилади хабарда.

Билдирилишича, 2019 йилдан бери Америка Қўшма Штатлари виза мурожаатчиларидан иммиграцион ва ноиммиграцион визага мурожаат этиш учун тўлдирилган формаларида ижтимоий тармоқ идентификаторларини кўрсатишларини талаб этади.

Визага мурожаат этиш учун тўлдирилган DS-160 формасида мурожаатчилар сўнгги 5 йил мобайнида ижтимоий тармоқларда фойдаланган барча исмлар ва тахаллусларини киритиши талаб этилади. Формани имзолаб юборишдан аввал мурожаатчилар тўлдирилган DS-160 формадаги барча маълумот тўғри ва ҳаққоний эканини тасдиқлашлари зарур. Ижтимоий тармоқлар билан боғлиқ маълумотни киритмаслик виза мурожаати бўйича рад жавоби берилишига ҳамда келгусида виза олиш ҳуқуқидан маҳрум бўлишга олиб келиши мумкин.

Ушбу талаб бугун, 21 июндан эътиборан кучга кирган.

Маълумот учун, АҚШнинг F турдаги визаси – бу талабалар учун мўлжалланган виза тури бўлиб, АҚШдаги аккредитациядан ўтган ўқув муассасаларда тўлиқ кундузги (full-time) ўқишни режалаштирган хорижий талабалар учун берилади. М визаси эса бу касбий (профессионал ёки техник) таълим дастурларида ўқишни режалаштирган талабалар учун мўлжалланган виза тури ҳисобланади. Ж визаси – бу алмашинув дастурларида иштирок этувчилар учун мўлжалланган J-1 Exchange Visitor визаси бўлиб, турли соҳаларда тажриба орттириш, тадқиқот ўтказиш, малака ошириш ёки маданий алмашинувда иштирок этиш имконини беради.

Эслатиб ўтамиз, аввалроқ АҚШ Давлат котиби Марко Рубио АҚШ визасига даъвогар айрим шахсларнинг ижтимоий тармоқлардаги саҳифаларини текширишни ва агар улар АҚШ ёки Исроилни танқид қилган бўлса, мамлакатга киришини тақиқлаш чораларини кўришни буюргани хабар қилинганди.