Бугун Қитъалараро кубок финали бўлиб ўтади

Бугун, 17 декабрь куни Парижнинг “Пари Сен-Жермен” жамоаси Қатарда Қитъалараро кубок финали доирасида Бразилиянинг “Фламенго” клубига қарши майдонга тушади.

Қитъалараро кубок финалида Европа Чемпионлар лигасининг амалдаги ғолиби ва Жанубий Америка Чемпионлар лигаси (Либертадорес) чемпиони ўзаро баҳс олиб боради. Шу кунгача ҳеч бир француз жамоаси Қитъалараро кубокни қўлга киритмаган, ПСЖ бу кубокни қўлга киритган биринчи француз жамоаси бўлиши мумкин.

“Фламенго” эса иккинчи Қитъалараро кубок чемпионлигини қўлга киритишга ҳаракат қилмоқда. Охирги марта улар 1981 йилда “Ливерпуль”ни мағлуб этган эди.

ПСЖ Европа чемпиони сифатида финалга тўғридан тўғри йўлланмани қўлга киритган бўлса, “Фламенго” финалга чиқиш учун Мексиканинг “Крус Асуль” ва Мисрнинг “Пирамидс” жамоаларини мағлуб этди.

Финал учрашуви Доҳадаги “Аҳмад бин Али” стадионида бўлиб ўтади ва Тошкент вақти билан 22:00 да бошланади.