Бу шармандалик ва фалокат – Флик ҳакамларни танқид қилди

“Барселона” бош мураббийси Ханс-Дитер Флик Испания кубоги ярим финали доирасида “Атлетико Мадрид”га қарши ўтказилган биринчи учрашувдаги ҳакамликни кескин танқид қилди.

Мадридда бўлиб ўтган ўйинда мезбонлар 4:0 ҳисобида ғалаба қозонди. Учрашувнинг 52-дақиқасида каталонияликлар ҳимоячиси Пау Кубарси киритган гол VAR орқали текширилиб, офсайд сабаб бекор қилинди. Қарор чиқариш учун ҳакамларга етти дақиқа вақт керак бўлди.

“Қанча вақт кутишимиз керак – етти дақиқа? Мен учун бу офсайд эмаслиги аниқ. Мен бунга бошқача қарайман. Гол инобатга олинмаганда, улар бизга ҳеч нарса тушунтирмайди. Ҳеч қандай алоқа йўқ. Нима учун офсайд берилганини тушунмаяпман. Бу шармандалик ва фалокат”, деди Флик.

Шунингдек германиялик мутахассис жамоасининг ўйини ҳақида ҳам фикр билдирди:

“Биринчи бўлим бизни умидсизликка туширди. Иккинчи бўлимда ўйинимизни яхшилашга ҳаракат қилдик, аммо ҳали ҳеч нарса тугагани йўқ. Олдинда жавоб ўйини бор. Биз ғалаба учун курашамиз. Бизга “Камп Ноу”да мухлисларимизнинг қўллаб-қувватлаши керак”, дея қўшимча қилди у.

Маълумот учун, жамоалар ўртасидаги Испания Кубоги ярим финал жавоб учрашуви жорий йилнинг 3 март куни бўлиб ўтади. Каталонияликлар мусобақанинг амалдаги чемпиони ҳисобланади.