“Бу ҳали бошланиши”. Нетаньяху Ғазога ҳужум давом этишини маълум қилди  

Исроил Бош вазири Биньямин Нетаньяху ўт очишни тўхтатиш бўйича музокаралар “фақат ўқ остида” ўтказилишини айтди. Бу ҳақда “Al Jazeera” хабар берди.

Қайд этилишича, Нетаньяху кеча, 18 март куни кечқурун телевидение орқали чиқиш қилиб, Исроил ҳарбийлари ҲАМАСга “кучайиб бораётган куч” билан зарба беришини маълум қилган. 

“ҲАМАС сўнгги 24 соат ичида кучларимизнинг оғирлигини ҳис қилди, мен сизни ва уларни ишонтириб айтмоқчиманки, бу фақат бошланиши. Биз урушдаги барча мақсадларимизга эришиш учун курашишда давом этамиз – барча гаровга олинганларни озод қилиш, ҲАМАСни йўқ қилиш ва Ғазо Исроилга таҳдид солмаслигига ваъда берамиз”, дейди Нетаньяху.

Шунингдек, у музокараларда силжиш йўқлигида тўғридан тўғри ҲАМАСни айблаган. 

“Исроил Президент Трампнинг махсус вакили Стив Уитковнинг таклифини қабул қилган бўлса-да, ҲАМАС буни қатъиян рад этди. Шу сабабли мен кеча ҲАМАСга қарши ҳарбий ҳаракатларни қайта бошлашга рухсат бердим”, дея ҳужумни изоҳлади Нетаньяху.

Шунингдек, Исроил Бош вазири Ғазодаги “барча кутилмаган қурбонлар” учун ҲАМАС жавобгар эканини даъво қилди. У ўз нутқида фаластинлик тинч аҳоли ҲАМАС билан ҳар қандай алоқадан қочиши кераклигини таъкидлаган.

Қайд этиш жоиз, ҲАМАС Трампнинг вакили таклиф қилган сулҳни рад этган бўлса-да, аввалги келишувларга риоя қилишни давом эттиришини билдирган. Миср ҳам Исроил ва ҲАМАСга Ғазо секторида 60 кунлик сулҳ, гаровга олинган қолган исроилликларни озод қилиш ва урушни тўхтатиш бўйича музокараларни бошлашни ўз ичига олган янги келишув таклифларини тақдим этди ва бу сафар ҲАМАСнинг ташаббусга дастлабки муносабати “умидбахш” бўлган.

Маълумот учун, Нетаньяхунинг баёноти Исроил икки ойлик сулҳдан сўнг 18 мартга ўтар кечаси Ғазо секторига ҳужумларни тиклагани фонида янгради. Исроил ҳужумларида 400 дан ортиқ фаластинлик тинч аҳоли ҳалок бўлди, уларнинг аксарияти болалар, яна 560 дан ортиқ киши яраланди. Фаластин соғлиқни сақлаш вазирлиги маълумотларига кўра, қурбонлар орасида 174 дан ортиқ бола бор.