Британиялик аёллар Тинч океанини эшкак эшиб кесиб ўтди

Британиялик сайёҳлар Жесс Роу ва Мириам Пейн тарихда биринчи марта Тинч океанини эшкак эшиб кесиб ўтди. Улар Перунинг Лима шаҳридан Австралиянинг Кэрнс шаҳригача 149 кун давомида 8 минг миль (тахминан 12 875 км) масофани босиб ўтиб, жаҳон рекордини ўрнатди. Бу ҳақда “The Telegraph” нашри хабар берди.

Икки аёл шу тариқа нафақат жаҳон рекордини ўрнатди, балки бу сафар давомида “The Outward Bound Trust” хайрия ташкилоти учун 50 минг фунт стерлингдан ортиқ маблағ тўплади.
Роу ва Пейн жорий йилнинг 5 май куни йўлга чиқиб, 17 октябрь куни манзилга етиб келди. Улар йўл давомида туз яралари, бузилган сув насоси, электр таъминоти узилиши каби синовларга дуч келди. Баъзи пайтларда ҳатто қуёш панеллари ишламай қолган, аммо Пейн шимининг матосидан фильтр ясаб, сувни тозалаш тизимини тиклаган.

Сайёҳларнинг сўзларига кўра, улар ҳар икки соатда алмашиб, туну кун эшкак эшиб сузишган. Кунига 5000 калория сарфлаган сайёҳлар сувсизланган овқат, творог ва макарон билан чекланишган, ҳатто кемада турп ва карам ўстиришга ҳам уринишган.

Саёҳатнинг энг хавфли лаҳзаси йўлнинг бошида юз берган. Саёҳатнинг саккизинчи кунида уларнинг кемаси рулдан айрилиб, Лима қирғоғидан 350 миль узоқликда тўлқинлар орасида қолиб кетган. Уларни денгизчи Алекс Хьюз қутқариб, қайиқни таъмирлашга ёрдам берган.

Эслатиб ўтамиз, аввалроқ британиялик спортчи Росс Эжли Исландиянинг 1600 км чегарасини тўлиқ сузган биринчи одам бўлиб, номини тарихга ёзганлиги ҳақида хабар берилган еди.