Британия ҳам Фаластинни тан олиши мумкин

Буюк Британия Бош вазири Кир Стармер мамлакат Фаластинни тан олиши мумкинлигини айтди. Бу ҳақда у ўзининг Х саҳифасида маълум қилди.

“Мен энг яқин иттифоқчиларимиз билан минтақада тинчлик ўрнатиш стратегияси устида ишлаяпман. Уруш оқибатида жабрланганларнинг ҳаётини ўзгартиришга қаратилган амалий ечимларга эътибор қаратмоқдаман. Бу стратегия жуда зарур бўлган ўт очишни тўхтатиш келишувини доимий тинчликка айлантириш учун зарур бўлган аниқ қадамларни ўз ичига олади. Фаластин давлатини тан олиш ана шу қадамлардан бири бўлиши керак”, деди у.

Стармернинг қўшимча қилишича, бу икки давлат ўртасида тинч-тотув яшаш ва икки мамлакат халқларининг хавфсизлиги учун шароит яратадиган кенгроқ режанинг бир қисми бўлиши керак.

Буюк Британия парламентининг учдан биридан ортиғи – тўққиз сиёсий партиядан 220 дан ортиқ депутат Бош вазир Кир Стармерга Фаластинни мустақил давлат сифатида тан олишга чақирувчи хатни имзолади.

“Биз Буюк Британиянинг Фаластин учун эркинлик ва мустақилликни таъминлай оладиган ҳолатда эмаслигини тан олсакда, Буюк Британиянинг тан олиниши бизнинг тарихий алоқаларимиз ва БМТ Хавфсизлик Кенгашига аъзолигимиз ҳисобга олинса, муҳим таъсир кўрсатади”, дейилади баёнотда.

Мактуб муаллифлари Фаластиннинг араб ва яҳудий қисмларга бўлинишидан олдин бу ҳудудни Буюк Британия бошқарганини ҳисобга олиб, Лондон томонидан тан олиниши “айниқса кучли таъсир” беришига ишонч билдирган. “The Guardian” ёзишича, кўплаб вазирлар, жумладан, Ташқи ишлар вазири Дэвид Лэмми ҳам Фаластинни имкон қадар тезроқ тан олиш тарафдори.

Эслатиб ўтамиз, аввалроқ Франция Президенти Эммануэль Макрон расмий Париж Фаластинни давлат сифатида расман тан олишга тайёрлигини айтганди. Унинг айтишича, ушбу қарор расман сентябрь ойида БМТ Бош Ассамблеясининг янги сессиясида эълон қилинади. “Reuters” Лейбористлар партиясидаги манбага таяниб, ҳукумат Исроилни қоралаш бўйича кейинги дипломатик қадамлар қўймагани учун баъзи партия аъзолари Стармердан норози эканини ёзди. Агентлик, шунингдек, Фаластиннинг тан олиниши Буюк Британия ва АҚШ ўртасидаги муносабатларни сезиларли даражада мураккаблаштириши мумкинлигини хабар қилди.