Британия Россиянинг 101 та нефть танкерига санкциялар жорий қилди

Буюк Британия ҳукумати Россия Президенти Владимир Путинга босимни кучайтириш ва Европа ҳамда Британиянинг ҳаётий муҳим инфратузилмасини ҳимоя қилишга қаратилган тарихдаги “энг кенг кўламли” санкциялар пакетини эълон қилди. Бу ҳақда Британия ҳукуматининг расмий сайтида эълон қилинди.

Қайд этилишича, ушбу санкциялар остига Россия нефтини ташувчи 100 та танкер ҳамда яна бир Кремлга фойда келтираётган ёки уни қўллаб-қувватлаётган деб топилган кема киритилган. Қироллик ҳукумати маълумотларига кўра, бу кемалар Путиннинг соя флотининг асосий қисмини ташкил этади ва 2024 йил бошидан бери қиймати 24 миллиард АҚШ долларидан ортиқ юк ташиган.

“Биз қўлимиздан келган барча чорани кўрамиз: унинг (Путиннинг) соя флотининг фаолиятини тўхтатиш, ҳарбий машинасини нефтдан тушаётган даромаддан маҳрум этиш ва кундалик ҳаётимизда таянувчи сувости инфратузилмамизни ҳимоя қилиш учун”, деди Буюк Британия Бош вазири Кир Стармер.

Шунингдек, Россиянинг “соя флотига” алоқадор 2Rivers Group (илгари Coral Energy Group) компанияси раҳбариятига нисбатан ҳам санкциялар жорий қилинган. Санкция остига тушганлар орасида Озарбайжон фуқаролари Тоҳир Гараев, Аҳмад Каримов, Анар Мадатли, Талат Сафаров ва Этибор Аюб ҳам бор. Юридик шахслар рўйхатига эса “Согласие” суғурта компанияси, шунингдек, Nord Axis, BX Energy ва Romarine фирмалари киритилган.

“Бугунги чоралар яна бир бор шуни кўрсатадики, Путиннинг ҳарбий машинасини молиялаштиришга ёрдам берганлар яшириниш учун жой топа олмайди”, дейилади Британия ҳукумати баёнотида.

Маълумот учун, 2Rivers Group компанияси Россия билан ҳамкорлиги сабабли 2024 йил декабридаёқ Британия санкциялари остига тушган. “The Wall Street Journal”га кўра, компания Россиядан нефть маҳсулотларини ташийдиган камида 100 танкердан иборат “соя флотига” эгалик қилган. Шунингдек, у “Роснефть” раҳбари ва Путин иттифоқчиси Игор Сечин билан алоқадорликда гумон қилинмоқда.

Эслатиб ўтамиз, аввалроқ АҚШ Президенти Дональд Трамп маъмурияти Украина урушини тўхтатишга интилиш белгиларини кўрсатмаётган Кремлга нисбатан янги иқтисодий чораларни ишлаб чиққани хабар қилинган эди. Вашингтон томонидан тайёрланган санкциялар “Газпром”, табиий ресурслар билан ишловчи айрим йирик компаниялар ҳамда банк соҳасидаги фирмаларни қамраб олади. Бироқ бу чоралар Трамп томонидан маъқулланиш-маъқулланмаслиги ҳали аниқ эмас.