Британия Ғарб етакчиларини яна Украина бўйича саммитга йиғяпти

Буюк Британия Ғарб етакчиларининг бир ой ичида Украина атрофидаги вазиятни муҳокама қилиш учун иккинчи учрашувини ўтказмоқда. 15 март куни видеоконференция орқали Ғарбнинг 25 етакчиси иштирокида Украина бўйича учрашув бўлиб ўтади. Бу ҳақда Буюк Британия Бош вазири идораси хабар берди.

Муҳокамаларда НАТО Бош котиби ва Европа комиссияси раҳбари, шунингдек, Европа давлатлари, Украина, Австралия, Янги Зеландия ва Канада вакиллари иштирок этади. Учрашувга Буюк Британия Бош вазири Кир Стармер мезбонлик қилади.

Қайд этилишича, Стармер йиғилиш иштирокчиларини Россия Президенти Владимир Путинни музокарага мажбурлаш учун унга иқтисодий босимни кучайтириш, тинчликни сақлаш учун Украинага ҳарбий ёрдам беришни давом эттириш ва Россия ҳужуми содир бўлган тақдирда мудофаа бюджетларини оширишга чақиради.

“Биз Президент Путинга Президент Трампнинг таклифи билан ўйин ўйнашига рухсат бера олмаймиз. Кремлнинг Трампнинг ўт очишни тўхтатиш ҳақидаги таклифига эътибор бермаслиги Путиннинг тинчликка жиддий қарамаслигини кўрсатади”, деди Стармер.

Британия Бош вазири Россия тинчликка рози бўлган тақдирда ҳам ўт очишни тўхтатиш режимига риоя қилишга тайёр бўлиши кераклигини, акс ҳолда, унинг сўзларига кўра, урушни тугатиш учун Россияга иқтисодий босимни кучайтириш учун барча имкониятларни ишга солиш кераклигини таъкидлади.

Стармер, шунингдек, Путинни ўт очишни тўхтатишни кечиктиришга уринаётганликда айблади.

“Дунёга маърузалар, бўш сўзлар ёки маъносиз шартлар эмас, балки ҳаракат керак”, деди у.

Британия Бош вазири Россияни яна бир бор Украинага қарши ҳужумларини тўхтатишга чақириб, Европа етакчилари улар тўхтамагунча барча саъй-ҳаракатларини қилишларини таъкидлади.

Маълумот учун, 11 март куни Саудия Арабистонининг Жидда шаҳрида АҚШ ва Украина вакиллари ўртасида музокаралар бўлиб ўтган. Музокаралардан сўнг, Украина Президенти девонининг раҳбари Андрей Ермак агар Россия худди шундай қадамга рози бўлса, Украина АҚШнинг 30 кунга ўт очишни тўхтатиш ҳақидаги таклифини қабул қилишга тайёрлигини билдирди. 13 март куни Жиддадаги Украина ва АҚШ музокараларидан икки кун ўтиб, АҚШ Президентининг махсус вакили Стив Уиткофф Москвага етиб келди. У таклифни Россия томони билан ҳам муҳокама қилиш режалаштирилган эди. Аммо икки ўртадаги учрашувдан олдин Владимир Путин Россия Украинада ўт очишни тўхтатиш таклифига розилигини, бироқ бу узоқ муддатли тинчликка олиб келишини айтди. Унинг сўзларига кўра, бир нечта нюансларни ҳисобга олиш керак, жумладан, ўт очишни тўхтатиш режимининг сақланишини кафолатлаш масаласи.

Эслатиб ўтамиз, 2 март куни Лондонда бўлиб ўтган учрашувдан сўнг якуний декларация қилинмаган, бироқ Стармер Украина учун коалиция тузиш режасини маълум қилганди.