Британия Эрондаги дипломатларини чақиртириб олди

Бугун, 27 февраль куни Буюк Британия хавфсизлик билан боғлиқ вазият туфайли Эрондаги элчихонаси ходимларини чақиртириб олди. Бу ҳақда Британия Ташқи ишлар, ҳамдўстлик ва тараққиёт вазирлиги (FCDO) хабар берди.

“Элчихона масофадан туриб ишлашда давом этмоқда (“Огоҳлантиришлар ва суғурта” бўлими). FCDO Эронга ҳар қандай сафарлардан тийилишни тавсия қилади”, дейилади хабарда.

Қайд этилишича, Британия элчихонаси 2025 йил июнь ойида ҳам Эронга саёҳат қилмаслик ҳақида огоҳлантириш эълон қилган бўлиб, унда Буюк Британия фуқаролари ва Британия-Эрон икки томонлама фуқаролигига эга шахслар ҳибсга олиниши, сўроқ қилиниши ёки ушлаб турилиши хавфи остида эканлиги маълум қилган.

Дипломатларнинг маълум қилишича, Эронда минтақавий кескинликнинг юқори хавфи сақланиб қолмоқда. Британия фуқароларига эҳтиёт чораларини кўриш тавсия этилади: инқирозли вазиятларда ҳаракат қилиш бўйича кўрсатмаларни ўрганиш, FCDO билдиришномаларига обуна бўлиш, ОАВдаги маълумотларни кузатиб бориш, ҳарбий ва қўриқланадиган объектлар яқинидаги ҳудудларга бормаслик ҳамда зарурат туғилганда хавфсиз жойларга яшириниш лозим.

Эслатиб ўтамиз, аввалроқ Эрон билан кескинлик кучайиб бораётган бир пайтда, Иорданиядаги АҚШ ҳарбий самолётлари сони кескин ошган эди.