Британия Афғонистонга қарийб 70 миллион доллар ажратадиган бўлди

Буюк Британия Афғонистонга гуманитар ёрдам кўрсатиш учун 50 миллион фунт стерлинг (69 миллион доллар) ажратади. Бу ҳақда бугун, 31 октябрь куни Британия Бош вазири Борис Жонсоннинг идораси тарқатган хабарда айтилган.

Қайд этилишича, ушбу маблағлар 2,5 миллион Афғонистон фуқаросига озиқ-овқат, дори-дармон, бошпана қуриш учун материаллар етказиб бериш орқали ёрдам кўрсатишга йўналтирилади. Аёл ва қизларга ёрдам беришга алоҳида эътибор қаратилади. Маблағлар сентябрь ойида Жонсон томонидан эълон қилинган 286 миллион фунт стерлинг (390 миллион доллар) қутқарув пакетининг бир қисми бўлади. Ушбу сумма БМТ ташкилотлари ва Халқаро Қизил Хоч Қўмитаси (ХҚХҚ) орқали юборилади.

“Икки ой олдин НАТО “Толибон” хавфи остида қолган, айниқса аёллар ва қизлардан иборат кўп сонли одамларнинг ҳаётини сақлаб қолган иттифоқ тарихидаги энг йирик эвакуация кампаниясидан кейин Афғонистондан ўзининг сўнгги кучларини олиб чиқиб кетди”, дейди Жонсон.

Унинг сўзларига кўра, бугунги молиялаштириш энг заиф одамларни зудлик билан ҳимоя қилишни таъминлайди. 

“Лекин Афғонистондаги гуманитар фалокатнинг олдини олиш ва ўтган йигирма йил давомида эришилган ютуқларни сақлаб қолиш учун чинакам глобал саъй-ҳаракатлар талаб этилади”, дея қўшимча қилди Британия ҳукумати раҳбари.

Эслатиб ўтамиз, жорий йилнинг 15 август куни мамлакатда ҳокимиятни эгаллаган толиблар, 19 август куни Афғонистон Ислом Амирлигини тузди. Жорий йилнинг 6 сентябрь куни “Толибон”га бўйсунмай турган ягона вилоят – Панжшер эгаллангач, 7 сентябрь куни ҳаракат раҳбарлари муваққат ҳукуматни шакллантирди. 

Қайд этиш керакки, толиблар Афғонистонда ҳокимиятга келгач, чет давлатлар ҳамда халқаро ташкилотлардан келаётган ёрдам тўхтаб қолди. Бундан ташқари, минглар афғонлар ватанини тарк этди ва бу жараён ҳали ҳам давом этмоқда. Толибларни Афғонистонда тарафдорлари кўплигига шубҳа йўқ, бироқ улар ҳокимиятга келгач кўплаб қийинчиликларга учрамоқда. Айниқса, молиявий томондан йўқотишлар катта.

Шундай бир даврдан жаҳон ҳамжамияти Афғонистонни беэътибор қолдирмоқчи эмас. Бундай хатога дунё етакчилари аввал йўл қўйган. Бунинг оқибатлари айниқса АҚШнинг эсидан чиқмайди. Афғонистон террорчи гуруҳлар уясига айланмаслиги учун жаҳон етакчилари “Толибон” билан ишламоқчи, ҳатто ушбу ҳаракат БМТ томонидан террорчилик ташкилоти, деб тан олинган бўлса ҳам.