Бразилияда собиқ президентга жиноий иш очилди

Бразилия Бош прокуратураси собиқ президент Жаир Болсонаруга 2022 йилги сайловда мағлуб бўлгандан сўнг давлат тўнтаришига уриниш айби билан жиноий иш қўзғатди. Бу ҳақда AP News хабар берди.  

Нашрнинг ёзишича, 69 ёшли Болсонару ва 33 нафар гумонланувчига жиноий гуруҳ тузиш ва демократик жараёнларга аралашишга уриниш каби жами 5 та айблов қўйилган.

“Айблов ҳужжатларида демократияга қарши ташкил этилган ва амалга оширилган фитна батафсил ёритилган”, дея маълум қилди Бразилия Бош прокурори Пауло Гонет Бранко.

Жумладан, Болсонару айбловларни бир неча бор рад этиб, ўзини сиёсий таъқиб қурбони деб атаган.

“Фуқаролар ва ҳарбийлар иштирокидаги бу гуруҳ 2022 йилги президентлик сайлови натижаларини тасдиқлаш жараёнига тўсқинлик қилишга ҳаракат қилган”, дейилади прокуратура баёнотида.

Маълумот учун, Болсонару 2019 йилдан 2023 йилгача мамлакат президенти бўлиб ишлаган, ўшанда унинг ўрнига Луис Инасиу Лула да Силва келган. 2023 йил январь ойида Болсонару тарафдорлари унинг сайловдаги мағлубиятидан норози бўлиб, мамлакат пойтахти Бразилияда норозилик намойишлари ва тартибсизликлар уюштирди. Улар ҳукумат биноларини эгаллаб олишга ҳаракат қилган. Президент саройи, парламент ва Олий суд биноси босиб олинган. Намойишлар полиция томонидан бостирилган. Ўша вақтда Болсонару АҚШда бўлган.

north_east

Нетаньяхунинг рафиқасига жиноий иш очилди

Эслатиб ўтамиз, аввалроқ Аргентина Президенти Хавьер Милей Libra номли мемкоин можароси марказида қолгани ҳақида хабар берилганди. У ушбу криптовалютанинг судхўрлик лойиҳаси билан алоқадорликда айбланмоқда. Мемкоиннинг нархи Милей уни қўллаб-қувватловчи пост эълон қилганидан сўнг кескин кўтарилиб, капитализацияси 4,5 миллиард долларга етган. Бироқ атиги уч соат ичида у 95 фоизга қулаган. Чунки инсайдерлар бу токенни катта миқдорда сотишни бошлаган. Шундан сўнг мухолифат Президентга импичмент эълон қилишни талаб қилган, шунингдек, юристлар Милейга қарши судга даъво аризаси топширган. Президент эса лойиҳага ҳеч қандай алоқаси йўқлигини таъкидлаб, коррупцияга қарши органларга мустақил тергов ўтказишни топширган.

Моҳимбегим Маъруфалиева