Аргентина Президенти “шармандали” фирибгарликда айбланмоқда

Аргентина Президенти Хавьер Милей Libra номли мемкоин можароси марказида қолди. У ушбу криптовалютанинг судхўрлик лойиҳаси билан алоқадорликда айбланмоқда. Бу ҳақда “Reuters” хабар берди.

Нашрнинг ёзишича, мемкоиннинг нархи Милей уни қўллаб-қувватловчи пост эълон қилганидан сўнг кескин кўтарилиб, капитализацияси 4,5 миллиард долларга етган. Бироқ атиги уч соат ичида у 95 фоизга қулаган. Чунки инсайдерлар бу токенни катта миқдорда сотишни бошлашган.

Шундан сўнг мухолифат Президентга импичмент эълон қилишни талаб қилган, шунингдек, юристлар Милейга қарши судга даъво аризаси топширган. Президент эса лойиҳага ҳеч қандай алоқаси йўқлигини таъкидлаб, коррупцияга қарши органларга мустақил тергов ўтказишни топширган.

Буэнос-Айрес фонд биржасидаги акциялар динамикасини акс эттирувчи S&P Merval индекси Хавьер Милейнинг криптовалюта можароси ортидан 5,8 фоиздан ортиқ пасайган. Кеча, 17 февраль кунги савдоларда индекс минимал даражада 2 248 906,2 пунктга тушган.

Аргентина парламентидаги мухолифат вакили Леандро Санторо ушбу можарони “халқаро миқёсда шарманда қилувчи” воқеа деб атаб, Президентга нисбатан импичмент жараёнини бошлаш талабини илгари сурган.

Милей эса ушбу мемкоинни тарғиб қилган постини ўчириб ташлаган. Маҳаллий оммавий ахборот воситаларига кўра, ушбу пост 14 февраль куни бир неча соат давомида ижтимоий тармоқда турган. Постда Libra лойиҳасининг Аргентинадаги иқтисодий ўсишга ҳисса қўшиши айтилган бўлиб, унда лойиҳа веб-сайти ва токен шартнома манзилига ҳавола жойлаштирилган бўлган.

Бир неча соатдан сўнг Милей янги пост эълон қилиб, бу лойиҳага алоқаси йўқлигини таъкидлаган ва нега реклама постини ўчиришга қарор қилганини тушунтирган.

“Мен бу лойиҳа тафсилотларидан бехабар эдим. Кейинроқ билганимда уни оммага тарғиб қилишдан воз кечишга қарор қилдим”, дейди у.

Эслатиб ўтамиз, аввалроқ Хавьер Милей ташкилотнинг COVID-19 пандемиясига қарши курашдаги усулларидан норозилигини билдириб, Ташқи ишлар вазири Херардо Херардо Вертейнуга мамлакатни Жаҳон Соғлиқни Сақлаш Ташкилотидан (ЖССТ) чиқариш бўйича топшириқ берган эди. Президент матбуот котиби Мануэль Адорни пандемия давомида ЖССТ томонидан амалга оширилган тадбирлар ва илгари ташкилотга президент бўлган Альберто Фернандес томонидан қабул қилинган қарорлар “Аргентина учун инсоният тарихидаги энг узоқ муддатли карантин”га олиб келганини ва мамлакатни “муайян давлатларнинг сиёсий таъсири остида бўлишига” сабабчи бўлганини таъкидлаган.