Бразилияда самолёт ресторанга бориб урилди (видео)

Бразилия жанубида кичик самолёт ресторан биносига бориб урилиши оқибатида уч киши ҳалок бўлди. Бу ҳақда бугун, 4 апрель куни G1 хабар берди.

ОАВ томонидан эълон қилинган кузатув камераси видеосида Риу-Гранди-ду-Сул штатининг шимолий қирғоғидаги Капао-да-Каноа шаҳрида самолёт қулаши лаҳзаси муҳрланган. Ҳаво кемаси тураржой уйларидан бирининг устига тушган, видеода тутун ва олов кўринади. Ушбу ҳудуддаги бинолар паст қаватли эканлиги қайд этилган.

“Самолёт учувчиси ва яна икки киши ҳалок бўлди... Самолёт бортида жами тўрт киши бўлган”, дейилади хабарда.

Ҳарбий бригаданинг дастлабки маълумотларига кўра, самолёт паст баландликда учаётган бўлган, кейин эса баландликни йўқотишни бошлаган ва ҳалокатга учраган.

Эслатиб ўтамиз, аввалроқ Қримда Ан-26 самолёти қулаган эди. Ҳалокат ярим оролнинг Боғчасарой туманидаги Куйбишево қишлоғи яқинида содир бўлган. Ҳодисадан бир оз олдин самолёт билан алоқа узилган. Россия Мудофаа вазирлиги хабарига кўра, 29 киши ҳалок бўлган. Дастлабки маълумотларга кўра, авиаҳалокатга техник носозлик сабаб бўлган. Вазирлик самолётга ташқи таъсир ўтказилмаганини таъкидлаган.