Бошловчи Нилуфар Сотиболдиевани ҳақорат қилган шахс жазоланди

Таниқли бошловчи Нилуфар Сотиболдиевани Instagram платформасида ҳақорат қилиб, изоҳ ёзган шахс жазоланди. QALAMPIR.UZ суд ҳукми билан танишди.

Маълум қилинишича, ўтган йили 30 июнь куни Навоий вилоятида яшовчи фуқаро Сотиболдиеванинг Таиланд давлатида қизи билан олган ва Instagram саҳифасига жойлаштирган видео остида бошловчини сўкиб, изоҳ қолдирган. 

Суд мажлисида судланувчи айбига тўлиқ иқрорлигини билдирган. Нилуфар Сотиболдиева эса ушбу ҳолат содир бўлгач мазкур шахсга “сенинг ҳам оиланг борми? Нимага бундай гапларни ёзасан”, деб мурожаат қилганлиги ва унинг расмини ўзининг аккаунтига жойлаштиргани, шундан сўнг ушбу аккаунт эгаси унга яна турли хил гапларни ёзиб расмларни олиб ташлашини сўраганлиги ва ушбу ҳолат бўйича ариза билан мурожаат қилганлиги, судланувчи билан ярашиш мумкинлиги ва ярашув институти тартиби тушунтирилганлиги, бироқ ярашмаслигини, зеро қолганларга дарс бўлишини, судланувчига нисбатан қонуний чора кўрилишини сўраб, маънавий зарар сифатида юз миллион сўм талаб қилиши ҳақида кўрсатма берган.

Судья Баҳром Бердиев судланувчини Ўзбекистон Республикаси Жиноят кодексининг 140-моддаси (Ҳақорат қилиш) 2-қисми билан айбдор деб топди. Унга иш ҳақининг 10 фоизини давлат даромади ҳисобига ушлаб қолган ҳолда 1 йил муддатга ахлоқ тузатиш ишлари жазоси тайинланди. 

Жабрланувчи Нилуфар Сотиболдиевага эса мазкур жиноят иши бўйича етказилган моддий ва маънавий зарар бўйича фуқаролик ишлари бўйича судга мурожаат қилиш ҳуқуқи борлиги тушунтирилган.

Эслатиб ўтамиз, олдинроқ Ўзбекистонда хизмат кўрсатган артист Матёқуб Матчонов танишини ҳақорат қилгани учун жаримага тортилганди.