Боғча болаларининг заҳарланишига истеъмолга яроқсиз сувнинг берилиши сабаб бўлган

2019 йил 18-19 июнь кунлари Сирдарё вилояти Боёвут тумани шифохонасининг юқумли касалликлар бўлимига 21-МТМнинг 3 ходими ва 22 тарбияланувчиси “ўткир ичак касаллиги, овқат токсикоинфекцияси” аломатлари билан келтирилган. Мактабгача таълим вазирлиги ишчи гуруҳи заҳарланиш сабабларига доир хизмат текшируви ўтказди.

Заҳарланишга истеъмол учун яроқсиз бўлган ичимлик суви сабаб бўлган. Гап шундаки, Сирдарё вилояти Боёвут туманида марказлашган ичимлик суви таъминоти мавжуд эмас. 2019 йил 17 июнь куни 21-МТМга ичимлик суви келтирилмаган ва муассаса мудираси маскан эҳтиёжлари учун истеъмолга яроқсиз бўлган ичимлик суви(канал суви)дан фойдаланишга қарор қилган. Бу эса, болалар ва ходимларнинг шифохонага тушишига олиб келган.

Суриштирув қуйидаги йўналишлар бўйича давом этади:

21-МТМ жорий йил март ойида таъмирланганидан сўнг, фаолиятини тиклаш учун рухсатнома берилиши.

Белгиланган қоидаларга кўра, марказлашган ичимлик суви таъминоти бўлмаса, маҳаллий ҳокимият идоралари МТТга ичимлик суви ташиб келтирилишини таъминлаши зарур. Боёвут тумани мактабгача таълим бўлими мудираси ишчи гуруҳга 21-мактабгача таълим муассасасини ичимлик суви билан таъминлашга доир шартномани кўрсата олмади. Санитар-эпидемиологик назорат томонидан МТМни очишга рухсат берилиши сабаблари Соғлиқни сақлаш вазирлиги билан ҳамкорликда аниқланади;

21-МТМда ичимлик суви захирасининг йўқлиги.

Ичимлик суви заҳираси махсус ҳажмли идишларда санитар меъёрларга амал қилинган ҳолда сақланиши керак.

“Мактабгача таълим вазирлиги хизмат текширувини давом эттиради, унинг натижаларига кўра, айбдорларга қонунчиликда белгиланган чоралар қўлланилади. Барча ҳудудларни ичимлик суви билан таъминлаш масаласи – улкан, серхаражат, аммо амалга оширса бўладиган лойиҳа бўлиб, Президент қарорига мувофиқ, 2025 йилгача тугалланиши режалаштирилган.

Ҳурматли мудирлар, агар сиз ичимлик суви таъминотида узилишларга дуч келсангиз, ёрдам сўраб МТВга мурожаат қилинг. Болалар соғлигини хавф остига қўйманг, бу мумкин эмас”, деди махсус МТТлар фаолиятини мувофиқлаштириш, реабилитайия ва болалар саломатлигини таъминлаш бўлими бошлиғи Умида Муҳиддинова.

Сирдарё вилояти ҳокимлиги МТВ мутахассислари билан биргаликда мактабгача таълим муассасаларини ичимлик суви билан узлуксиз таъминлаш масаласини ишлаб чиқмоқда.

Президентнинг 2018 йил 30-сентябрдаги ПҚ-3955-сонли “Мактабга таълим бошқарув тизимини такомиллаштириш чора-тадбирлари тўғрисида”ги қарорига мувофиқ, масъул вазирлик ва идоралар 2025 йилга қадар босқичма-босқич равишда республика МТТларини ичимлик суви, электр энергияси ва табиий газ билан таъминлаши керак. Дастурда Уй-жой коммунал хизмат кўрсатиш вазирлиги, Мактабгача таълим вазирлиги, Иқтисодиёт вазирлиги, Молия вазирлиги, Инвестициялар бўйича давлат қўмитаси, “Ўзбекэнерго” АЖ, “Ўзтрансгаз” АЖ, “НЭК” АЖ, Қорақалпоғистон Республикаси Вазирлар кенгаши, вилоятлар ва Тошкент шаҳар ҳокимликлари иштирок этади.