BMW Mercedes’ни синдирмоқчи. Компания янги “Гелик” ишлаб чиқаради

BMW илк бор ҳақиқий рамали йўлтанламас ишлаб чиқишга киришди. Германия матбуоти қўлга киритган патент ҳужжатларига кўра, янги модель афсонавий Mercedes G-Class – Гелендвагенга рақобатчи бўлиши мумкин ва у электр қувватида ҳаракатланувчи бруталь йўлтанламас сифатида тақдим этилиши кутилмоқда. Бу ҳақда Германиянинг “Auto Bild” нашри хабар берди.

Премиум немис автомобиллари оламида катта рақобат бошланиши мумкин. Афтидан, Бавариянинг BMW концерни Mercedes-Benz’нинг афсонавий G-Class модели орқали люкс тоифасидаги “кубик” йўлтанламаслар бозорида узоқ йиллар давомида етакчилик қилиб келаётганига жим қараб туришдан чарчаган.

Германиянинг “Auto Bild” нашри ихтиёрига BMW’нинг янги патент аризасига оид махфий чизмалар келиб тушган. DE 10 2024 130 768.4 рақамли ҳужжатлардан маълум бўлишича, компания ҳақиқий рамали йўлтанламас устида ишламоқда. Бу бренд мухлислари учун катта ўзгариш ҳисобланади. Чунки шу пайтгача марканинг барча кроссоверлари – кичик X1 дан тортиб йирик X7 гача фақат юк кўтарувчи кузовли енгил автомобил конструкциясига эга эди.

Йўлтанламас технологиялари: трансформер рама ва карбон

BMW муҳандислари анъанавий усулдан воз кечиб, модулли зинасимон рамани ишлаб чиққан. Патентнинг асосий жиҳатларидан бири Трансформер-рама бўлиб, кўндаланг ва диагонал бирикмалар бир хил қилиб ишланган. Шу сабаб конструкцияни осон узайтириш, қисқартириш ёки кенгайтириш мумкин. Бу BMW’га бир платформа асосида турли ўлчамдаги автомобиллар чиқариш имконини беради. Масалан, уч эшикли Wrangler услубидаги модел ёки беш метрли катта экспедиция автомобили яратилиши мумкин. Mercedes G-Class эса бундай мослашувчанликка эга эмас.

Шу билан бирга, компания оғир пўлат ўрнига алюминий ва юқори мустаҳкам углепластик – карбон қўллашни режалаштирган. Бу автомобилни енгил ва бирга мустаҳкам қилади. Бундан ташқари, ҳужжатларда раманинг ичига оғир аккумуляторлар ва электр моторларини жойлаштириш тафсилотлари келтирилган. Бензин ёки дизель двигателлари ҳақида деярли маълумот йўқ. Шу сабабли янги модел тўлиқ электр қувватида ҳаракатланувчи йирик йўлтанламас бўлиши мумкин. Ҳатто ҳар бир ғилдирак учун алоҳида мотор қўлланиши эҳтимоли бор.

Инсайдерлар маълумотига кўра, компания ичида ушбу лойиҳа G74 Rugged деб номланган. Бу сўзни тахминан “мустаҳкам” ёки “бруталь” деб таржима қилиш мумкин. Моделнинг тўлиқ тақдимоти ўн йиллик охирига – тахминан 2029 йилга мўлжалланган. Ишлаб чиқариш АҚШнинг Спартанбург шаҳридаги BMW заводида йўлга қўйилиши режалаштирилмоқда. Ҳозир у ерда барча юқори тоифадаги X серияси автомобиллари йиғилади.

Эслатиб ўтамиз, аввалроқ премиум-классдаги автомобилларни йиғишга ихтисослашган Германиянинг энг йирик автоконцернларидан бири Mercedes-Benz ҳарбий техникалар ишлаб чиқаришни бошлаши мумкинлиги ҳақида хабар берилганди.