БМТ Термиз орқали Афғонистонга ёрдам жўнатди 

Бугун, 15 декабрь куни Бирлашган Миллатлар Ташкилотининг Қочқинлар ишлари бўйича агентлиги Ўзбекистоннинг Термиз шаҳридан Афғонистонга юк машиналарида гуманитар ёрдам жўнатди. Бу ҳақда агентлик сайтида хабар берилган. 

Таъкидланишича, юклар Ўзбекистон ҳукумати кўмагида Термиз юк марказида ташкил этилган БМТ Қочқинлар ишлари  бўйича Олий комиссарлиги гуманитар марказидан жўнатилган. Ўзбекистон жанубида, Ўзбекистон-Афғонистон чегарасидан икки километрдан камроқ масофада жойлашган Термиз юк маркази БМТ Қочқинлар ишлари бўйича Олий комиссарлигининг афғон халқига инсонпарварлик ёрдами кўрсатиш борасидаги саъй-ҳаракатларидаги асосий элемент ҳисобланади. 

Қайд этилишича, гуманитар  ёрдам тахминан 40 тонна ошхона жиҳозлари ва чойшаб каби асосий эҳтиёжларни ўз ичига олади. Жорий йилнинг октябрь-ноябрь ойларида Термизга ҳаво ва қуруқлик орқали етказилган ушбу товарлар маҳаллий захираларни тўлдириш ва пайдо бўлаётган эҳтиёжларни қондириш учун юк машиналари орқали Афғонистонга жўнатилган. 

“Ҳозир миллионлаб афғонлар озиқ-овқат таъминотидан маҳрум бўлиб, қаттиқ қишга қарши ўта ҳимоясиз экан, одамларнинг ҳаётини сақлаб қолиш ва инсонпарварлик инқирозининг олдини олиш учун шошилинч ёрдам зарур”, дейди БМТ Қочқинлар ишлари бўйича Олий комиссарлиги катта маслаҳатчиси жаноб Франк Ремус. 

Таъкидланишича, БМТнинг Қочқинлар ишлари бўйича Олий комиссарлиги ўзининг минтақадаги фавқулодда вазиятларга жавоб бериш ва тайёрланиш стратегиясининг бир қисми сифатида Термизга гуманитар юкларни олдиндан жойлаштирган. 

Қайд этилишича, Термиз шаҳридаги БМТ Қочқинлар ишлари бўйича комиссарлик маркази асосий эҳтиёжлар захираларини сақлашдан ташқари, Афғонистон, Эрон ва Марказий Осиёдаги БМТ Қочқинлар ишлари бўйича Олий комиссарлик операцияларига ёрдам бериш учун гуманитар юкларни бирлаштириш ва ўтказиш пункти сифатида ҳам фойдаланилади. 

Шунга кўра, инсонпарварлик юкларининг мунтазам партиялари БМТ Қочқинлар ишлари бўйича Олий комиссарлигининг Афғонистондаги фавқулодда вазиятларга жавоб бериш операцияси давомида Термиз орқали жўнатилади.