Блинкен Алиев билан Озарбайжон ва Арманистон орасидаги тинчлик масаласини муҳокама қилди

Кеча, 16 сентябрь куни АҚШ Давлат котиби Энтони Блинкен ва Озарбайжон Президенти Илҳом Алиев ўртасида телефон орқали мулоқот бўлиб ўтди. Бу ҳақда давлат департаменти ва Президент матбуот хизматлари хабар берди.

Телефон орқали суҳбат чоғида Энтони Блинкен Арманистон ва Озарбайжон ўртасида барқарор тинчликка эришиш муҳимлигини таъкидлади. Унинг айтишича, Америка Қўшма Штатлари бу мақсадга эришиш учун саъй-ҳаракатларини давом эттиради.

Блинкен Арманистон ва Озарбайжон ўртасидаги чегарани делимитация қилиш соҳасида эришилган ютуқлар, жумладан, 2024 йил 30 августда чегарани делимитация қилиш комиссияларининг биргаликдаги фаолияти тўғрисидаги Низом имзоланганини ижобий қадам сифатида баҳолади.

Президент Илҳом Алиев Энтони Блинкенга минтақада аллақачон тинчлик ўрнатилганини маълум қилди. Давлат раҳбари Озарбайжоннинг саъй-ҳаракатлари натижасида минтақада адолат ва халқаро ҳуқуққа асосланган янги воқелик ва статус-кво вужудга келганини алоҳида таъкидлади.

Президент Илҳом Алиев Арманистон ва Озарбайжон ўртасидаги тинчлик шартномаси ташаббускори унинг мамлакати эканини таъкидлади. Ушбу шартномани имзолаш учун давлат раҳбари Арманистоннинг Конституция ва бошқа қонун ҳужжатлари асосида Озарбайжонга нисбатан ҳудудий даъволаридан воз кечиши, шунингдек, ўтмиш қолдиғи бўлган ЕХҲТ Минск гуруҳи ва унга алоқадор барча институтлар фаолиятини тўхтатиш муҳимлигини айтди.

Чегараларни делимитация қилиш масаласига келсак, Президент Илҳом Алиев икки томонлама жараён доирасида эришилган ижобий натижаларни қайд этиб, бу жараён Низом асосида амалга оширилишини қўшимча қилди.

Телефон мулоқоти чоғида Озарбайжонда COP29 ўтказиш масаласи кўтарилди. Блинкен Қўшма Штатлар Озарбайжонни COP29 ни муваффақиятли ўтказишда қўллаб-қувватлашини таъкидлади. Унинг таъкидлашича, АҚШ ва Озарбайжон жамоалари ва делегациялари яқиндан ҳамкорлик қилмоқда. Бу ҳамкорликдан мамнунлигини билдирган Илҳом Алиев, CRA доирасида иқлим молиясига оид муҳим қарорлар қабул қилиниши борасида, айниқса ривожланган давлатлар томонидан консенсусга эришишга умид қилишини билдирди.

Шунингдек, Озарбайжон ва АҚШ ўртасидаги икки томонлама муносабатлар юзасидан фикр алмашилди.