Биз Россия билан алоқадамиз – Трамп
Олам
−
31 Январь
5617American Airlines йўловчи самолёти АҚШ армиясининг Black Hawk вертолёти билан тўқнашиб, Вашингтон яқинидаги Рональд Рейган миллий аэропорти яқинида Потомак дарёсига қулаганди. Ҳалокат оқибатида самолёт бортидаги барча йўловчилар ва иккала экипаж аъзолари ҳалок бўлган. Бу ҳақда АҚШ Президенти Дональд Трамп кеча, 30 январь куни Оқ уйдан америкаликларга йўллаган мурожаатида маълум қилди.
Трамп бортида нафақат америкаликлар, балки бошқа давлатлар, жумладан Россия фуқаролари ҳам бўлган қурбонларнинг яқинларига ҳамдардлик билдирди. У фалокат ҳолатларига ойдинлик киритиш учун ҳамма нарсани қилишга ваъда берди. Текширув Федерал авиация бошқармаси (FAA), Миллий транспорт хавфсизлиги кенгаши ва Пентагон томонидан олиб борилади.
Президентнинг айтишича, америкалик расмийларнинг тўқнашувга нима сабаб бўлганлиги ҳақида “жиддий фикрлари” бор.
“Биз бу фалокатга нима сабаб бўлганини билмаймиз, лекин бизда жуда кучли фикр ва ғоялар бор”, деди Трамп.
Оқ уй раҳбари авиадиспетчерларни ёллашда стандартларга риоя қилиш зарурлигини таъкидлади ва ўзидан олдинги президент Жо Байденнинг ушбу соҳадаги сиёсатини қоралаб, FAA'ни инклюзия дастурлари орқали малакасиз ходимларни ёллашда айблади. Трамп ўзининг буйруқларидан бири орқали барча авиакомпаниялар учун хавфсизлик талабларини оширганини, шу билан бирга хилма-хиллик, тенглик ва инклюзивликни рағбатлантириш дастурларини бекор қилганини айтди.
Журналистлар саволларига жавоб берар экан, Трамп самолёт ҳалокатида ҳалок бўлганлар орасида россияликлар бўлгани учун Вашингтон Москва билан алоқада эканини айтди.
"Биз аллақачон Россия билан алоқадамиз", деди Трамп.
Шунингдек, у Вашингтон Россия фуқароларининг қолдиқларини қайтаришга ёрдам берадими, деган саволга жавоб бериб: "Ҳа, қиламиз", деган.
Унинг аниқлик киритишича, йўловчи самолёти бортида бошқа давлат фуқаролари ҳам бўлган.
Трамп авиация бўйича собиқ юқори лавозимли амалдор Крис Рочелауни FAA маъмури вазифасини бажарувчи этиб тайинлаганини ҳам эълон қилди. Рочелау АҚШ ҳарбий-ҳаво кучлари фахрийси бўлиб, FAA'да 20 йилдан ортиқ хизмат қилган, илгари Миллий бизнес авиацияси ассоциациясининг бош операцион директори лавозимида ишлаган. Манбаларга кўра, Сенат Савдо қўмитасида юридик маслаҳатчи бўлиб ишлаган Лиам МакКенна FAA'нинг бош маслаҳатчиси этиб тайинланган.
Маълумот учун, 29 январь куни кечаси АҚШ пойтахти Вашингтон шаҳрида American Airlines авиакомпаниясининг Bombardier CRJ700 йўловчи самолёти Рональд Рейган аэропортида қўниш вақтида Sikorsky H-60 (Black Hawk) ҳарбий вертолёти билан тўқнашиб, Потомак дарёсига қулаб тушган. Самолёт бортида 60 йўловчи ва тўрт экипаж аъзоси, вертолётда уч ҳарбий хизматчи бўлган. Иккала томон ҳам Потомак дарёсига тушиб кетганди. Самолёт бортида фигурали учиш бўйича жуфтлик баҳсларида Жаҳон чемпиони бўлган россиялик Евгения Шишкова ва Вадим Наумов ҳам бўлгани айтилди. Воқеа жойида ишлаётган полиция ходимининг сўзларига кўра, 30 нафар ҳалок бўлганларнинг жасади сувдан чиқариб олинган.
Эслатиб ўтамиз, аввалроқ Ўзбекистон Республикаси Президенти Шавкат Мирзиёев ушбу фожиали авиаҳалокат оқибатида кўплаб инсонлар ҳалок бўлгани муносабати билан Америка Қўшма Штатлари Президенти Дональд Трампга таъзия мактуби йўллаган эди.
LiveБарчаси