“Биз хато қилдик”. Путин фуқаролик объектларига ҳужумлар ҳақида гапирди

Россия Президенти Владимир Путин ҳарбий операция давом этаётган бир пайтда фуқаролик инфратузилмасига зарбалар берилишининг олдини олишнинг ягона йўли ҳаво ҳужумидан мудофаа тизимини кучайтириш эканини айтди. Бу ҳақда у Шарқий иқтисодий форумнинг ялпи мажлисида сўз очди.

Путиннинг сўзларига кўра, Россия томони қуролли можаро шароитида ҳам фуқаролик объектлари ҳужум нишонига айлантирилмаслиги керак, деган қарашдан келиб чиққан.

“Биз бу вазиятга нега дуч келдик? Чунки фуқаролик объектлари ҳар қандай ҳужум нишонига айланиши мумкин эмас, деб ҳисоблаган эдик. Шу маънода биз хато қилдик. Афсуски, душманимиз бошқача фикрлайди”, деган Путин.

Путинга кўра, Россия зарбаларга “кўзгу тамойили” асосида жавоб беришга мажбур бўлган, компаниялар эса ўз корхоналарини ҳимоя қилишга маблағ йўналтира бошлаган. Президентнинг таъкидлашича, кўрилаётган чоралар аллақачон керакли натижаларни бермоқда.

“Биз буни давом эттирамиз. Бу келажак учун фойдали бўлади. Бу ҳар доим хавфсизликнинг маълум шартлари ва кафолатларини яратади. Таъмирлаш ишлари олиб борилмоқда”, дея қўшимча қилган Президент.

Эслатиб ўтамиз, аввалроқ Владимир Путин Украинадаги ҳужумлар оқибатида зарар кўрган логистика ва омборлар сиғимларини тиклаш кераклигини айтган эди.