Бирорта ғўддайган бойвачча пайдо бўлса, кечирмайман – Президент (видео)

Ҳар бир тадбиркор ва компания олдин Ўзбекистон харитасини билади, лекин у ерда жиноятчиликни жиловлашга эришилган-эришилмаганини ҳам инобатга олади. Бу ҳақда Президент Шавкат Мирзиёев жорий йилнинг 11 сентябрь куни Тошкент шаҳри туманларини ривожлантириш, инвестиция ва бандликни ошириш, маҳаллаларда замонавий инфратузилма яратиш масалалари бўйича видеоселектор йиғилишида сўз очди.

Президент йиғилишда ҳуқуқни муҳофаза қилувчи органлар раҳбарларига мурожаат қилган.

“Жиноятни жиловламагунимизча ишнинг баракаси бўлмайди, тадбиркор келмайди. Мана шуни билинглар. Ҳар бир тадбиркор, компания олдин Ўзбекистоннинг харитасини билади, лекин жинояти жиловланганми, йўқми ҳисобга олади. Шунинг учун, сен Ички ишлар вазири ҳаммага намуна бўлишинг керак. Ҳаммаларинг шуни билинглар, кичкина иш қилмаяпсизлар”, дейди Шавкат Мирзиёев.

Шунингдек, Президент Ўзбекистондаги тинчликка шукроналик билдириш кераклгини, лекин шу билан бирга икки карра кўп ишлаш зарурлигини ҳам айтган.

“Вақтинча иш қиламан деб ўйламанглар. Битта нарсани билинглар, шукроналар дейишимиз керак бу тинчликка. Лекин халқимиз тинч яшаши учун икки карра кўп ишлашимиз керак. Одамлар тинч, бемалол уйида, эмин-эркин, ҳеч кимдан қўрқмасдан яшаши керак”, дейди Ўзбекистон етакчиси.

Бундан ташқари, Шавкат Мирзиёев Ўзбекистонда бирдамлик, ҳамжиҳатлик бўлиши зарурлигини қайд этган.

“Бирорта ғўддайган бойвачча пайдо бўлса, бирортангни кечирмайман. Мана шуни билгин ҳамманг. Давлат бўлиши керак. Ана шунда бизда бирдамлик бўлади, ҳамжиҳатлик бўлади, одамлар бизга ишонади”, дейди Президент.

Эслатиб ўтамиз, 2025 йилнинг декабрь ойи охирида Шавкат Мирзиёев Олий Мажлис ва Ўзбекистон халқига йўллаётган мурожаатномасида Ўзбекистоннинг жиноий тўдалар фаолиятига чек қўйишга куч-қудрати етишини ва буни албатта қилишини айтган эди.