Бирорта бозор, дўкон ё овқатланиш шохобчалари ёпилмайди – ДСҚ раиси (видео)

Жамият 5533

Ўзбек халқи азалдан сабр-тоқати, матонати билан бошқа халқларга ўрнак бўлган. Оғир даврлар, ҳатто, уруш йилларида ҳам халқимиз ҳар қайси масалага илм-маърифат билан ёндашган. Аммо, дунё бўйлаб тарқалган коронавирус одамларни ваҳимага тушириб, дўконларга ёпирилишга мажбур қиляпти. Ўзбекистон кичик қишлоқ ё овул эмаски, эпидемия сабаб мамлакат аҳолиси оч қолса. 

Бугун, 15 март куни Вазирлар Маҳкамасида Ўзбекистон Республикасига коронавируснинг кириб келиши ва тарқалишининг олдини олиш юзасидан чора тадбирлар дастурини тайёрлаш бўйича Республика махсус комиссиясининг Матбуот анжумани ўтказилди. Унда мамлакат ушбу вирусни енгиш учун моддий, тиббий жиҳатдан барқарор экани, шунингдек, тиббий асбоб-ускуналар, дори-дармонлар, озиқ-овқатлар захираси яратилгани, ваҳимага ҳожат йўқлиги айтилди. Шунга қарамай, мамлакатда коронавирус билан боғлиқ илк ҳолат аниқлангани ҳақидаги хабарлар тарқалиши билан одамлар ўзини дўконларга урди. Гўёки эрта ё индин нархлар ошиб кетармиш. 

Комиссия йиғилишида алоҳида қайд этилдики, озиқ-овқат маҳсулотларининг нархи сунъий равишда кўтарилиб кетмаслиги учун барча зарур чоралар кўрилган ва бу давом эттирилмоқда. Айни вақтда мазкур ишларга Ўзбекистон Республикаси Бош прокуратураси ҳузуридаги Иқтисодий жиноятларга қарши кураш департаменти ва Давлат солиқ қўмитаси бош-қош бўлиб турибди. Давлат солиқ қўмитаси раиси Беҳзод Мусаев мамлакатдаги вазият ҳақидаги қуйидагиларни гапирди: 

“Биринчи навбатда ваҳимага тушмаслик керак. Ўтган икки ой давомида бирор маҳсулотнинг нархи ошдими? Ёки нарх ошишига бирор омил таъсир қилдими? Ҳеч қандай таъсир бўлгани йўқ. Солиқ органлари, Бош прокуратура ҳузуридаги департамент ходимлари билан биргаликда доимий ишлайдиган махсус штаб тузилади ва ҳар бир бозорда вазият доимий асосда назоратга олинади. 

Шукрона қилиб айтишимиз керакки, Ўзбекистон – озиқ-овқат маҳсулотлари билан ўзини ўзи бемалол таъминлай оладиган мамлакат. Гўшт маҳсулотлари ё полиз маҳсулотлари бўладими, ҳамма маҳсулотлардан ҳеч қандай муаммо бўлмайди. 

Ваҳимага тушмаслик учун шу нарсани айтмоқчимизки, Ҳукумат ва бунга масъул бўлган идоралар томонидан бундай вазият доимий асосда назоратга олинмоқда. Нафақат Тошкентда, балки ҳудудларда ҳам бирорта бозор, бирорта савдо дўкони, бирорта умумий овқатланиш шохобчаларининг ёпилишига йўл қўйилмайди. Бозорларимиз тўкин-сочин, маҳсулотларимиз етарли”. 

Ҳурматли фуқаролар, коронавирус билан боғлиқ вазият сабаб ваҳима кўтаришга асос йўқ. Вирусни юқтириб олмаслик учун санитария-гигиена қоидаларига риоя қилинг.

Qalampir.uz Tahririyati
Мақолага баҳо беринг
Баҳолаганлар: 126
Рейтинг: 3
t
×