Биринчи ўрин ҳам, иккинчи ўрин ҳам ўзбекларники!

Жорий йилнинг 16 январидан 1 февралига қадар Нидерландиянинг Вейк-ан-Зее шаҳрида шахмат бўйича дунёдаги энг нуфузли турнирлардан бири  Tata Stell Chess 2026 мусобақаси бўлиб ўтди. Унда дунёнинг етакчи гроссмейстерлари қаторида иштирок этган Ўзбекистон вакиллари биринчи ва иккинчи ўринларни эгаллаб, мусобақанинг мутлақ етакчисига айланди.

Турнирнинг мутлақ ғолиби сифатида Нодирбек Абдусатторов эътироф этилди. У 13 тур давомида 9 очко жамғариб, барча рақибларини ортда қолдирди ва якка ҳокимлик билан чемпионликни қўлга киритди. Таъкидлаш жоизки, бу Абдусатторовнинг Tata Stell турниридаги бешинчи иштирокида қўлга киритган илк чемпионлиги бўлди. Ушбу ғалаба унга халқаро рейтингда яна дунёнинг энг кучли топ-5 шахматчилари сафига кириш имконини берди.

Мусобақада Жавоҳир Синдаров ҳам муносиб иштирок этди. У турнир давомида бирорта ҳам мағлубиятга учрамасдан, барқарор ва ишончли ўйин намойиш этди ҳамда кумуш медаль соҳибига айланди. Эътиборли жиҳати шундаки, Синдаров мазкур турнирда илк бор қатнашди. Эришилган юқори  натижасида у жаҳон рейтингида 21-ўриндан 11-ўринга кўтарилиб, шахсий фаолиятидаги энг юқори кўрсаткични қайд этди.

Бугунги кунда ўзбекистонлик гроссмейстерларнинг халқаро майдондаги муваффақиятлари жаҳон шахмат ҳамжамияти томонидан эътироф этилмоқда. Ушбу ютуқлар мамлакатимизда шахмат спортига бўлган қизиқишни янада ошириб, ёш авлод орасида ушбу интеллектуал спорт турининг оммалашувига хизмат қилмоқда.

Маълумот ўрнида қайд этиш жоиз, Нодирбек Абдусатторов 13–15 февраль кунлари Германияда бўлиб ўтадиган ФИДЕ Фристайле Chess World Championship мусобақасида иштирок этиб, яна бир бор Ўзбекистон шарафини ҳимоя қилади.

Беҳзод Шамсутдинов