Берлусконидан қанча мерос қолгани маълум бўлди

Жорий йилнинг 12 июнь куни вафот этган Италиянинг собиқ бош вазири Сильвио Берлусконининг мероси салкам 5 миллиард еврога баҳоланмоқда. Мерос унинг 5 фарзанди ва 16 набирасига ўтади. Бу ҳақда “Corriere della Sera” газетаси хабар берди.

Келтирилишича, Берлусконига тегишли бойликнинг асосий улуши 4,89 миллиард еврога баҳоланган “Fininvest” оилавий ҳолдингига тўғри келади, унинг таркибига “Mediaset” телекомпаниясининг 50 фоизи ва “Mondadori” нашриётининг 53 фоизи, шунингдек, “Mediolanum” банки киради. Беш фарзанднинг ҳар бири (биринчи никоҳдан икки каттаси – Марина ва Пьер Сильвио – у ерда асосий ўринларни эгаллайди) 7,65 фоизга эгалик қилади.

Forbes журналининг сўнгги рейтингига кўра, Берлускони Италиянинг энг бой одамлари рўйхатида учинчи ўринни эгаллаган. Баъзи йилларда у биринчи ўринга чиққан. Журнал унинг бойлигини 6,9 миллиард еврога баҳолаган.

Берлускони бизнесдан ташқари, бир нечта вилла, сарой ва уйларга эга бўлган. Унинг Милан яқинидаги энг машҳур қароргоҳи Аркордаги Вилла Сан Мартино бўлиб, у ерда кеча, 13 июнь куни сиёсатчи билан видолашув якка тартибда, фақат яқинлари учун бўлиб ўтган. Шунингдек, Берлусконининг яна бир машҳур қароргоҳи – Сардиния оролидаги ёзги Сертоса ҳисобланади.

Берлускони Милан яқинида яна бир нечта виллага, шунингдек, Римдаги қадимий Аппиан йўлидаги уйга эгалик қилган. Газета, шунингдек, сиёсатчинининг хориждаги, жумладан, Канн, Бермуд ва Антигуадаги мулки ҳақида ҳам хабар берган.

Моддий меросдан ташқари, Берлускони ҳали ҳам ўзи асос солган ва бошқарган “Олға, Италия” партиясига эга. Маҳаллий таҳлилчиларнинг фикрича, бу “ягона етакчи” партия усиз ҳам эртами кеч йўқ бўлиб кетади. “Олға, Италия” ҳукмрон коалиция таркибига кираётгани ва Гиорги Мелони ҳукуматини қўллаб-қувватлаётганини инобатга олиб, унинг раҳбарлигини ким қўлга киритиши ҳақида ОАВда тахминлар бор.

Эслатиб ўтамиз, икки кун олдин Италиянинг собиқ бош вазири Сильвио Берлускони 87 ёшида Миландаги шифохонада вафот этган эди.