Белгород ўққа тутилди. Қурбонлар бор

Бугун, 15 февраль куни Украинадан Россиянинг Белгород шаҳрига ракета ҳужуми оқибатида беш киши ҳалок бўлди. Бу ҳақда Россия Федерациясининг Белгород вилояти губернатори Вячеслав Гладков маълум қилди.

“Дастлабки маълумотларга кўра, Белгородда 5 киши ҳалок бўлган, улардан 1 нафари бола, яна 18 киши жароҳатланган, улардан 5 нафари болалар. Тез ёрдам бригадалари жабрланганларни тиббиёт муассасаларига етказмоқда”, деб ёзди вилоят раҳбари.

Гладковга кўра, Белгород шаҳрида еттита хусусий хонадонда турли хил шикастланишлар аниқланди: деразалар синган, томлар ва панжаралар шикастланган. Бешта кўп қаватли уйнинг бир нечта хонадонларининг ойналари синган, 5 га яқин автомобил шрапнелдан зарар кўрган. Шунингдек, битта дўконга шикаст етган, саноат корхоналаридан бирининг ҳудудига зарар етган.

Россия Мудофаа вазирлиги ҳаво ҳужумига қарши мудофаа тизимлари Белгород вилояти ҳудудида RM-70 Vampire кўп ракета тизимларидан (MLRS) 14 та ракетани йўқ қилганини хабар берган. Вазирликнинг билдиришича, ҳужум соат 12:30 атрофида содир бўлган.