Беларусга ишга борган ўзбекистонликлар Андижон ҳокимига мурожаат билан чиқди (видео)

Ижтимоий тармоқларда Беларусь Республикасига ишлаш учун борган бир гуруҳ Ўзбекистон фуқароларининг даромад ва меҳнат шароитлари масаласида Андижон вилояти ҳокимига мурожаат йўллагани акс этган видеолар тарқалди. Мазкур видеомурожаатда фуқаролар Беларусда иш берувчи томонидан таклиф қилинган 500 долларлик ойлик ўта камлиги ҳамда бу шароитда хорижда ишлашдан кўра, Ўзбекистонга қайтиб, меҳнат қилиш маъқул эканини айтган. Шунингдек, улар масалани ҳал этишда Андижон вилояти ҳокимидан амалий ёрдам сўраган.

“Ҳурматли ҳокимимиз, бу ерда 500 доллардан ишлайдиган бўлсак, 200 доллари қорнимизга кетса, 100 доллари, мисол, совун-повун, киримизга, савдо-павдоларга кетадиган бўлса, 200 доллар учун бу ерда юриб, вақтимизни ўтказиб, сарсон бўлишимизнинг фойдаси йўқ.

Ундан Ўзбекистонга жўнатиб юборгани яхши. 500 доллар ойлик айтяпти, емоғинг ўзингдан, ётоқни ўзинг тўлайсан деяпти. 200 доллардан унга чиқиб кетса, 200 доллар пул қоляпти. Ўзбекистонда биз ундан кўпроқ топамиз. Шуни ҳал қилишингизни сўраймиз”, деган фуқаролардан бири.

Эслатиб ўтамиз, Беларусь Президенти Александр Лукашенко Ўзбекистон Президенти Шавкат Мирзиёев билан учрашувда ўзбекистонликларни Беларусда ишлаш учун таклиф қилган эди.

Дилнура Уринова