Беларусь Россиядан яна саккизта Ми-35 вертолётини олади

Беларусь Қуролли кучлари Россиядан яна саккизта Ми-35 вертолётларини олади. Бу ҳақда 50-аралаш вертолёт авиабазаси қўмондони Владимир Скоркин маълум қилди.

Унинг айтишича, Беларусь йил охиригача тўртта вертолёт олишни кутмоқда. Келгуси йили эса яна шунча вертолёт мамлакат Қуролли кучларига топширилади.

“Яъни, Ми-35ларнинг тўлиқ эскадрони шакилланади”, дейди Скоркин СТВ телеканали эфирида.

Қайд этиш жоизки, вертолётлар бир неча ҳафта ичида ишга тушиши кутилмоқда. Янги дастгоҳларни бошқарадиган учувчилар ва муҳандис-техник ходимлар эса Россия Федерациясида қайта ўқитилган.

Маълумот учун, Ми-35 кўп мақсадли ҳужум вертолёти Ми-24 нинг модернизация қилинган версияси бўлиб, у зирҳли техникани, душман ишчи кучини йўқ қилиш, моторли милтиқ ва танк бўлинмаларига ўт очиш, десант қўшинларини тушириш ва ярадорларни эвакуация қилиш учун мўлжалланган. Шунингдек, Ми-35 кабинада ва ташқи слингда юк ҳам таший олади. Вертолёт экипажи икки кишидан иборат бўлади.

Эслатиб ўтамиз, жорий йилнинг 17 август куни Беларусь Мудофаа вазирлиги Россиядан олиб келинган тўртта Ми-35 вертолётининг биринчи партияси республикага келганини маълум қилганди.