Бельгияда 60 мингга яқин одам Бош вазирга қарши намойишга чиқди

Кеча, 13 февралдан бошлаб Бельгия пойтахти Брюссель шаҳрида 60 мингга яқин одам янги Вазирлар Маҳкамаси эълон қилган тежамкорлик сиёсатига қарши норозилик намойиши ўтказди. Бу ҳақда “La Libre” хабар берди.

Қайд этилишича, одамлар пенсия ислоҳоти ва давлат харажатларини қисқартиришга қарши норозилик билдирган.

Нашрга кўра, намойишчилар 10 кун олдин қасамёд қилган янги Бош вазир Барт Де Вевернинг ташаббусидан норози.

“Бюджет тақчиллиги ошиб бораётган бир шароитда Вазирлар Маҳкамаси раҳбари Бельгия Европа Иттифоқи томонидан эҳтимолий санкцияларга дуч келгани сабабли, харажатларни, жумладан, ижтимоий соҳани чеклашга ваъда берди”, дейилади хабарда.

Шунингдек, Вазирлар Маҳкамаси пенсия ёшини ошириш ва ҳарбий хизматга тааллуқли бўлган мажбурий иш стажини 11 йилга узайтиришни режалаштирган.

Ҳукумат бюджетни қисқартириш орқали 2029 йилгача 23 млрд евро тежашга умид қилмоқда. Бу эса касаба уюшмалари ва ҳуқуқ ҳимоячиларининг норозилигига сабаб бўлган.

Ҳукуматга қарши намойишларга ўт ўчирувчилар ва ҳарбийлар қўшилган. Брюсселнинг айрим ҳудудларида намойишчилар ва полиция ўртасидаги тўқнашувлар қайд этилган.

Эслатиб ўтамиз, жорий йилнинг 24 январь куни Словакия бўйлаб бир қанча шаҳарларда Бош вазир Роберт Фицонинг сиёсатига қарши намойишлар ўтказилганди. Митингларни “Украина учун тинчлик” фуқаролик бирлашмаси ташкил этган. Улар Фицо ҳаракатларини танқид қилган.