Бельгия хатолик билан Беларусь ўрнига “Тинчлик кенгаши”га киритилди. Лукашенко ҳайратда

Оқ уй Бельгияни хатолик билан “Тинчлик кенгаши”га қўшилишга рози бўлган давлатлар рўйхатига киритди. Бельгия давлати Беларусь билан адаштирилган бўлиши мумкин. Бу ҳақда кеча, 22 январь куни Американинг “NBC News” телеканали хабар берди.

Қайд этилишича, Трамп маъмурияти “Тинчлик кенгаши”га қўшилган 22 мамлакат рўйхатини эълон қилган. Рўйхатга Бельгия, Озарбайжон, Аргентина, Арманистон, Баҳрайн, Болгария, Венгрия, Миср, Индонезия, Иордания, Қозоғистон, Қатар, Косово, Марокаш, Мўғулистон, Бирлашган Араб Амирликлари (БАА), Покистон, Парагвай, Саудия Арабистони, Туркия ва Ўзбекистон киритилган. Бироқ, рўйхатга Беларусь киритилмаган. Ваҳоланки, 20 январь куни Беларусь резиденти Александр Лукашенко ташкилотга қўшилиш тўғрисидаги ҳужжатни имзолаганини маълум қилганди.

“Мен ҳозиргина ҳужжатни имзоладим. Мен улар сўраганидек, Қўшма Штатларга тегишли мурожаатни имзоладим, унда биз уларнинг ушбу Кенгашнинг асосчи аъзоси бўлиш таклифини қабул қилишга тайёр эканлигимиз билдирилган”, деганди Лукашенко.

Шунингдек, у “Тинчлик кенгаши”нинг ваколати ва таъсирини бошқа минтақаларга, биринчи навбатда Украина можароси шароитида кенгайтириш имкониятига кўпроқ қизиқиш билдираётганини айтганди.

Бельгия Ташқи ишлар вазирлиги эса, “Тинчлик кенгаши” низомини имзоламаганини билдирди. Бельгия Бош вазирининг ўринбосари ва ташқи ишлар вазири Максим Превост вазиятга изоҳ берди. 

“Бельгия “Тинчлик кенгаши” низомини имзоламади. Бу борадаги ҳисобот нотўғри. Биз Европанинг ягона ва мувофиқлаштирилган жавоб беришини истаймиз. Кўпгина Европа мамлакатлари сингари, бизда ҳам бу таклифга шубҳа бор”, деб ёзди у ижтимоий тармоқлардаги саҳифасида.

Оқ уй Бельгияни Беларусь билан адаштириб юборди, жумладан, биринчисини “Тинчлик Кенгаши” аъзо давлатлар рўйхатига киритганини иддао қилди. Бироқ, Қўшма Штатларнинг маълум қилишича, Бельгия ташкилотга қўшилиш тўғрисидаги ҳужжатни имзолаган, аммо сўнгги дақиқада фикрини ўзгартирган.

Бельгия расмийлари америкаликларнинг хабарларини рад этмоқда. 

“Биз ҳеч қачон ҳужжатни имзолаш ниятини билдирмаганмиз. Биз америкалик ҳамкорларимизга уни ҳозирги шаклда имзолай олмаслигимиз сабабларини маълум қилдик”, деди Превост матбуот хизмати.

Маълумот ўрнида, “Тинчлик Кенгаши” Ғазо сектори учун тинчлик режасини қўллаб-қувватлаш учун ташкил этилган. Бироқ, унинг низомини кўриб чиққан кузатувчилар, ташкилотнинг ваколатлари анча кенгроқ бўлиши мумкинлигини ва бу уни БМТга рақибга айлантириши мумкинлигини таъкидламоқда. Тинчлик Кенгашига қўшилиш учун 60 га яқин давлат таклифнома олди. Ушбу мамлакатларнинг 30 дан ортиғи, жумладан, Россия, Озарбайжон, Арманистон, БАА ва Туркия таклифномани қабул қилди.

Болгария ва Венгриядан ташқари Европа Иттифоқи мамлакатлари ташкилотга қўшилишдан бош тортдилар (Норвегия, Словения, Франция ва Швеция) ёки таклифномага изоҳ бермадилар. Буюк Британия ҳам Тинчлик кенгаши низомини имзолашдан бош тортди.  Давосдаги Жаҳон иқтисодий форумида (WEF) бўлиб ўтган имзолаш маросимида 19 мамлакат вакиллари иштирок этди.

Эслатиб ўтамиз, аввалроқ Трамп Канаданинг Тинчлик кенгашига қўшилиш таклифини бекор қилди.