Байден TikTok’ни тақиқлаш тарафдори эканини айтди

АҚШ Президенти Жо Байден агар TikTok’ни тақиқловчи ҳужжат Конгресс томонидан тасдиқланса, мазкур қонун лойиҳасини имзолашини айтди. Бу ҳақда “NBC News” хабар берди.

Қайд этилишича, кеча, 8 март куни АҚШ Вакиллар палатасининг Савдо ва энергетика бўйича қўмитаси бир овоздан АҚШда TikTok’ни тақиқловчи қонун лойиҳасини маъқуллаган. Америкаликларни “чет эллик ҳужумчилар томонидан бошқариладиган иловалар”дан ҳимоя қилишга қаратилган қонун лойиҳасига Висконсин штатидаги республикачи Майк Галлагер ва Иллинойс штатидан демократ Ража Кришнамурти ҳомийлик қилган.

"Агар у қабул қилинса, мен унга имзо чекаман", дейди Байден.

Қонун лойиҳаси TikTok’га эгалик қилувчи Хитойнинг “ByteDance” компаниясини олти ойга илова устидан назоратдан воз кечиши ёки илованинг Қўшма Штатларда бутунлай чекланишини назарда тутади.

Эслатиб ўтамиз, олдинроқ АҚШ Конгрессининг Вакиллар палатаси ТikTok'ни тақиқловчи қонун лойиҳасини ишлаб чиққани ҳақида хабар бергандик.

Райҳона Улканбаева