Байден Мексика орқали АҚШга ўтган ноқонуний муҳожирларга бошпана беришни тақиқлади

АҚШ Президенти Жо Байден АҚШнинг жанубий чегарасини ноқонуний кесиб ўтган муҳожирларга бошпана беришни вақтинча тақиқлади. Бу ҳақда Оқ уй матбуот хизмати тарқатган баёнотда айтилади.

"Ушбу чора доимий эмас", дейилади баёнотда.

Унга кўра, чекловлар муҳожирлар оқими АҚШнинг Мексика билан чегарасида сиғимдан ошиб кетган даврларга нисбатан қўлланилади. Айни пайтда эса вазият айнан шундай.

Ҳужжатда, шунингдек, чекловлар расмийларга “Қўшма Штатларда бўлиш учун қонуний асосга эга бўлмаган шахсларни тезроқ чиқариб юбориш” имконини бериши таъкидланган. Шу билан бирга, тақиқ ҳамроҳсиз болалар ва “одам савдоси қурбонлари” учун гуманитар истисноларни назарда тутади.

Оқ уй янги чекловлар АҚШнинг жанубий чегарасида Конгресс даражасида назорат чораларини кучайтириш орқали эришиладиган натижаларга эриша олмаслигини таъкидлади. Бундан ташқари, улар мамлакатнинг "жанубий чегарасини янада мустаҳкамлаш" учун маблағ ажратишни назарда тутмайди.

"Конгресс ҳали ҳам чора кўриши керак", дейилади Оқ уй баёнотида.

Май ойининг охирида АҚШ жанубий чегарасида назоратни кучайтириш, чегарада қочқинлар сони кўпайса, Оқ уйга муҳожирларга бошпана бериш имкониятини чеклаш учун маблағ ажратадиган қонун лойиҳаси яна Конгресс Сенатида овоз беришдан ўта олмаган. Вакиллар палатаси спикери Майк Жонсоннинг таъкидлашича, бу қонун лойиҳаси чегарадаги назорат чораларини кучайтирмайди, фақат иммиграция қонунчилиги масалаларини ҳал қилади.