“Барселона”нинг “Камп Ноу” стадиони реконструкциясида ишчи вафот этди

“Барселона” футбол клуби “Камп Ноу” стадионида реконструкция ишлари олиб борилаётган вақтда қурилиш ишчиси вафот этди. Бу ҳақда ESPN хабар берди.

Клуб эълон қилган қисқа баёнотда “кеча иш жойида содир бўлган бахтсиз ҳодиса оқибатида ҳаётдан кўз юмган ишчининг вафотидан чуқур қайғуда эканини” билдирди. Шунингдек, марҳумнинг оиласи, яқинлари ва ҳамкасбларига ҳамдардлик изҳор этилди.

Каталония полициясининг маълумотига кўра, 54 ёшли ишчи бошидан олган оғир жароҳати оқибатида вафот этган.

“Associated Press” агентлигининг сўровига кўра, ҳодиса юзасидан бошқа тафсилотлар очиқланмаган.

“Барселона” 2023 йилда Европадаги энг катта футбол стадиони ҳисобланган “Камп Ноу”ни капитал реконструкция қилиш ишларини бошлаган эди. Қурилиш ишлари давом этаётганига қарамай, жамоа ўтган йилнинг ноябрь ойида чекланган миқдордаги томошабинлар учун стадионни қисман очган.

Каталония клуби сўнгги икки мавсумда Испания Ла Лигаси чемпионлигини қўлга киритди. Янги мавсумни эса жамоа жорий йилнинг 23 август куни “Элче” майдонида бошлайди.

Жамоанинг “Камп Ноу”даги илк уй учрашуви 27 август куни “Атлетик Бильбао”га қарши бўлиб ўтади. Бу ўйин реконструкция ишлари давом этаётган стадионда ўтказилади.

Реконструкция тўлиқ якунлангач, стадион сиғими 105 минг томошабинга етади ва “Камп Ноу” яна Европадаги энг катта футбол стадиони мақомини мустаҳкамлайди.