“Барселона” Неймарнинг агентларидан таклиф олди

Неймарнинг агентлари уни собиқ жамоаси, “Барселона”га таклиф қилди. Бу ҳақда “Mundo Deportivo” нашри хабар берди.

Маълум қилинишича, ПСЖ клуби ҳужумчисининг агентлари мижозини Каталония клубига таклиф қилган, бироқ “Барселона” арим сабабларга кўра, бу таклифни рад этган. Асосий сабаблардан бири клубдаги молиявий ҳолатлар бразилиялик билан шартнома имзолашига йўл қўймаслиги бўлса, бошқаси Неймарнинг жамоадаги бошқа футболчилар билан бўлган муносабати.

Футболчининг вакиллари Лионель Месси “Барселона” берган таклифни рад этиб, АҚШнинг “Интер Майами” клубига ўтиб кетганидан сўнг, унинг “кўк-анорранглилар” сафига қўшилиш имкониятини юқори баҳолаган.

Каталония клуби раҳбарияти мураббийларга бразилиялик футболчининг трансферини ташкил қилиш имконияти ҳақида маълум қилган, бироқ, мураббийлар қатъиян рад этган. “Барселона” мураббийлари Неймарнинг даражасига шубҳа қилмайди, лекин ҳозирги муҳитни ҳисобга олган ҳолда, уни жамоага олиб келиш шартмас, деб ҳисоблайди. 

Маълумот учун, “Барселона” ҳозирда бошқа бир бразилиялик футболчи Витор Роке трансфери устида ишламоқда.