“Барселона” “Камп Ноу”га қачон қайтиши аниқ бўлди

Испаниянинг “Барселона” жамоаси икки йилдан ортиқ танаффусдан сўнг жорий йилнинг 22 ноябрь куни Ла Лига доирасида “Атлетик Билбао”га қарши учрашувда ўзининг қайта қурилган “Камп Ноу” стадионига қайтади. Бу ҳақда клуб матбуот хизмати хабар берди.

“Камп Ноу” стадиони 2022-2023 йилги мавсум охирида ёпилганидан бери Каталония клуби асосан Монтжуикдаги “Олимпия” стадионида уй учрашувларини ўтказиб келаётган эди. “Камп Ноу”нинг қайта қурилиш жараёнидаги кечикишлар ва 1,5 миллиард евролик харажатлар туфайли очилиш дастлабки режалардан бир йилга кечикди. Дастлаб, жамоа 2024 йил декабрь ойида стадионга қайтишни мақсад қилган эди.

Янги “Камп Ноу”нинг илк ўйинида 45 401 нафар томошабинга рухсат берилади. Қурилиш тўлиқ якунлангач, арена 105 минг мухлисни қабул қила олади. Жорий йилнинг 7 ноябрь куни ўтказилган синов машғулотида стадион 23 000 мухлис қабул қилган эди.

Клуб жорий йилнинг 9 декабрь куни Чемпионлар лигаси доирасида “Айнтрахт”ни ўз майдонида қабул қилади, бироқ бу учрашувни “Барселона” мавсум бошида хавфсизлик рухсатномасини ололмагани сабабли  “Олимпия” стадионида ўтказишга мажбур.

Маълумот учун, эски “Камп Ноу” 1957 йилда қурилган бўлиб, сиғими 99 000 кишини ташкил қилган эди. 

Эслатиб ўтамиз, аввалроқ “Барселона” президенти Жоан Лапорта клуб афсонаси Лионель Мессининг ҳайкали яқинда қайта очиладиган “Камп Ноу” ташқарисида ўрнатилишини маълум қилган эди.