“Барселона” Бастонини трансфери бўйича музокараларни бошлади

Испаниянинг “Барселона” жамоаси Алессандро Бастонини трансфер қилиш имкониятларини жиддий ўрганмоқда. Бу ҳақда инсайдер Фабрицио Романо хабар берди.

Манбага кўра, каталонияликлар “Интер” ҳимоячисининг вакиллари билан алоқа ўрнатиб, эҳтимолий трансфер борасида дастлабки муҳокамаларни олиб борган. Шу билан бирга, “Барселона” футболчининг атрофидагилар орқали “нерадзурри” клубига босим ўтказиш ниятида эмас.

Трансфер амалга ошиши мумкин бўлган сценарийлардан бири сифатида кўрилмоқда. “Интер” эса Бастонини жамоанинг муҳим футболчиларидан бири деб ҳисоблайди ва уни сотишга рози бўлиши учун жуда катта миқдорда таклиф талаб этади.

Маълумот учун, “Интер” Бастонини 2017 йилда “Аталанта”дан 31 миллион евродан ортиқ маблағ эвазига трансфер қилган. У дастлаб икки йилни ижара асосида “Аталанта” ва “Парма”да ўтказган, 2019 йилдан эса миланликлар сафида асосий таркиб футболчисига айланган. Шу вақт ичида Бастони “Интер” сафида 293 та ўйинда майдонга тушиб, 8 та гол урди ва 30 та голли узатмани амалга оширди.