“Спутник Озарбайжон” директори Бакудан чиқиб кетди

Озарбайжоннинг Баку шаҳрида бир неча тартибсизликлар ортидан ҳибсга олинган “Спутник Озарбайжон” ижрочи директори Игорь Картавих озод қилинди ва Россияга учиб кетди. Бу ҳақда РБК хабар берди.

Қайд этиш жоиз, унинг қамоқдан озод этилиши Душанбе шаҳрида Россия Президенти Владимир Путин ва Озарбайжон Президенти Илҳом Алиевнинг учрашуви арафасида содир бўлган. Путин ўша учрашувда Озарбайжон раҳбаридан узр сўраган. 

Картавих, “Спутник Озарбайжон” бош муҳаррири Евгений Белоусов, шунингдек, нашрнинг яна беш нафар журналисти июнь охирида Озарбайжоннинг Россия билан муносабатлар совуқлашган бир пайтда, Бакуда ҳибсга олинган эди. 1 июль куни “Спутник Озарбайжон” таҳририятида ўтказилган операциядан сўнг, мамлакат Ички ишлар вазирлиги фирибгарлик, ноқонуний тадбиркорлик ва жиноят йўли билан қўлга киритилган мулкни легаллаштириш бўйича иш қўзғатди. Суд қарорига кўра, Картавих ва Белоусов ўша куннинг ўзида тўрт ой муддатга қамоққа олинган.

Шунда Россия ТИВ Озарбайжон элчиси Раҳмон Мустафоевни “Бакунинг дўстона бўлмаган ҳаракатлари ва журналистларнинг ноқонуний ҳибсга олиниши муносабати билан” чақирган эди. Дипломатик вакилга россиялик журналистларни зудлик билан озод қилишни талаб қилган нота топширилган.

9 октябрь куни Россия Президенти Владимир Путин Тожикистонда бўлиб ўтган саммитда Озарбайжон Президенти Илҳом Алиев билан учрашди. Кейинги куни Путин Россия ва Озарбайжон ўртасида давлатлараро муносабатларда инқироз бўлмагани, бу фақат “ҳиссий кризис” бўлганини таъкидлади. 10 октябрь Картавих Бакуда уй қамоғига ўтказилганди.