Ayrim avtoturargohlarda QR-kod orqali to‘lov tizimi joriy etiladi

O‘zbekiston bozorlardagi avtoturargohlarda QR-kod orqali to‘lov tizimi joriy etiladi. Bu haqda Hukumatning joriy yilning 2 iyul kuni qabul qilingan “Bozorlar va savdo komplekslarida raqamlashtirish ishlarini samarali tashkil etish hamda maishiy korrupsiyaning oldini olishga doir chora-tadbirlar to‘g‘risida”gi qarorida so‘z boradi.

Qarorga ko‘ra, joriy yil 1 oktyabrgacha “E-bozor” yagona raqamli bozor platformasi sinov tarzida, 2027 yil 1 martgacha to‘liq amaliyotga joriy etiladi.

Unda quyidagilar nazarda tutiladi:

• bozorlar va savdo komplekslari pasporti, manzili, bo‘sh savdo shoxobchalari va savdo o‘rinlari ochiq e’lon qilib borilishi;
• aholini bozorlar va savdo komplekslari faoliyatiga oid ma’lumotlar bilan tanishtirish, bozor ma’muriyatiga elektron murojaat yo‘llash va javob olish imkoniyatlari.

“E-bozor” platformasi “Soliq” axborot tizimlari kompleksi tarkibida joriy etiladi.

Har bir bozor va savdo kompleksiga soliq xodimlari biriktiriladi va ularning faoliyati samaradorligi kunlik tahlil qilib boriladi.

Bozorlar hududida va ularga tutash hududlarda joylashgan avtotransportlarni vaqtincha saqlash joylarida to‘lovlarni yagona QR-kod orqali to‘lash imkoniyati yaratiladi.

2026 yil 1 avgustdan transportlarni saqlash joylaridan chiqarib yuborish bo‘yicha ruxsatnoma faqat ma’muriy ishni ko‘rib chiquvchi organ va ijro organi tomonidan “Jarima maydonchasi” axborot tizimida QR-kod bilan tasdiqlanadi va elektron tarzda yuboriladi.

Eslatib o‘tamiz, avvalroq O‘zbekistonda naqdsiz hisob-kitoblarni rivojlantirish hamda yagona milliy to‘lov infratuzilmasini shakllantirish maqsadida Yagona milliy QR-kod tizimi ishga tushirilayotgani haqida xabar berilgan edi.