“Атлетико” Альваресни “Барселона”га сотиш эҳтимолини 0 фоиз деб баҳолади

Аргентиналик ҳужумчи Хулиан Альвареснинг “Атлетико Мадрид”дан “Барселона”га ўтиши эҳтимоли 0 фоизни ташкил қилади. Бу ҳақда Мадрид клуби Испаниянинг “Marca” нашрига берган баёнотида маълум қилди.

Аввалроқ, “Барселона” президенти Жоан Лапорта Альварес трансферини муҳокама қилиш учун “Атлетико Мадрид” билан боғланишга тайёрлигини билдирган эди. ОАВда ҳам футболчининг Каталония клубига ўтиши мумкинлиги, ҳужумчи бундай трансферга қизиқиш билдираётгани ҳақида хабарлар тарқалган эди.

Шунингдек, “Атлетико Мадрид” мухлислари Испания чемпионатининг иккинчи турида “Вильярреал”га қарши учрашувда (2:2) аргентиналик футболчини ҳуштакбозлик билан қарши олганди.

“Футболчига нисбатан босим ўтказилмоқда, аммо Хулиан билан боғлиқ вазиятда ягона жабр кўрган томон биз бўлдик. Бизга иқтисодий ва ижтимоий зарар етказилди. Уни “Барселона”га сотиш эҳтимоли – 0 фоиз. Бу масала пул ҳақида эмас, балки қадр-қиммат ҳақида”,  дейилади “Атлетико” баёнотида.

Маълумот учун, 26 ёшли Альварес 2024 йилдан бери “Атлетико Мадрид” сафида тўп тепиб келмоқда. У бундан аввал Англиянинг “Манчестер Сити” клубида ўйнаган.

Альварес “Манчестер Сити” билан икки марта Англия чемпиони, Чемпионлар лигаси, Клублар ўртасидаги жаҳон чемпионати, Англия кубоги, Англия Суперкубоги ва UEFA Суперкубогини қўлга киритган.

Альварес Аргентина миллий терма жамоаси сафида 59 та учрашувда майдонга тушиб, 15 та гол урган ва 4 та голли узатмани амалга оширган. У терма жамоа билан 2022 йилги Жаҳон чемпионати, икки марта Копа Америка (2021 ва 2024) ҳамда 2022 йилги Финалиссима ғолиби бўлган.