Умурзоқовнинг ҳокимлиги – ҳақиқий трагедия – Кушербоев (видео)

Экология ва иқлим ўзгариши миллий қўмитасининг Экология қонунчлигини такомиллаштириш масалалари бўйича раис маслаҳатчиси, Олий Мажлиснинг собиқ депутати ва жамоат фаоли Расул Кушербоев ижтимоий тармоқдаги саҳифасида Тошкент шаҳрининг ҳокими Шавкат Умурзоқовнинг шаҳар ҳокими эканлиги ҳақиқий фожиалигини айтиб, Умурзоқов ҳокимликда бўлган вақтидаги шаҳарда бўлаётган ишларга кескин норозилик билдириб чиқиш қилди. 

Экоқўмита раиси маслаҳатчисининг сўзларига кўра, дарахт кесишни трагедия, деб билмайдиган шахснинг ҳоким бўлиши ҳақиқий трагедия.

“Ҳоким бува” хато гапирганмиди? 

Гап шундаки, яқиндагина Тошкент шаҳрининг амалдаги ҳокими Шавкат Умурзоқовнинг шаҳардаги дарахт кесилиши ҳолатлари ҳақида гапирган гаплари ижтимоий тармоқларда айланиб, турли талқинлардаги муносабатларга сабаб бўлаётган эди. Интервью давомида журналист “ҳоким бува”дан шаҳардаги дарахт кесилиши ҳолатларига қандай муносабатда эканлиги ҳақида сўраган. Умурзоқов эса, бунга салбий муносабатда эканлиги айтган. 
Бироқ унинг таъкидлашича, халқ манфаати биргина дарахтнинг манфаатидан устун ва агар, халқ манфаати учун бўлса, дарахтларни кесиш гўёки жоиз. 

“Касалланмаган бўлса, у дарахт заруратсиз кесиб ташланган бўлса ёки шахсий эҳтиёжига боғланган бўлса, албатта, унга фикрим салбий. Бироқ зарарланган дарахтни олиб ташлаш ёки бирор-бир бундан ҳам яхши лойиҳани амалга ошириш учун шароит яратиш, экологик ёки мана шу халқ манфаатини кўзланган лойиҳа бўладиган бўлса, албатта битта тарозига битта дарахтни қўйиш керак эмас. Ўша халқ манфаати қаерда юқори бўлса, шуни кўриш керак”, деган шаҳар ҳокими. 

Унинг айтишича, битта дарахт кесилишини трагедия сифатида билмаслик керак, чунки дарахт экадиган жойлар кўп. 

“Худога шукур, дарахт экадиган жойларимиз кўп, экологик муҳитни яхшилайдиган ишларимиз тури ҳам кўп. Шуларни амалга оширишимиз керак. Битта дарахт кесилиб қолса яхши эмас, лекин уни трагедия қилишимиз керак эмас”, деб таъкидлаган Умурзоқов.

Кушербоев нимадан норизо? 

Ҳокимнинг бу фикри тармоқларда турли муҳокамаларга сабаб бўлаётган бир вақтда, кеча, 20 май куни жамоат фаоли Расул Кушербоев ушбу ҳолатга ўз муносабатини билдирди. Унинг сўзларига кўра, дарахт кесишни трагедия, деб билмайдиган шахснинг ҳоким бўлиши ҳақиқий трагедия. 

Кушербоевнинг таъкидлашича, Тошкент бугунгидек қонунсизликни, бугунгидек ёмон муҳитни кўрмаган ва у қонунсиз шаҳарга, ҳудудга айланган. Шу билан бирга, собиқ депутат ҳокимликнинг ҳозирги ишларига кескин муносабатини ҳам айтиб ўтган.  

“Битта дарахтни кесилишини трагедия қилиш керак эмас, деб айтаётган одамнинг ўзини ҳоким бўлиб туриши ҳақиқий трагедия аслида. Бугун Тошкент қонунсиз шаҳарга, ҳудудга айланди. Бугун Тошкентда хусусий мулк дахлсизлиги, Конституциядаги кафолатларга тупурилди. Бугун Тошкентда халқдан йўллар олиниб, чизиб-чизиб қўйилиб, пулли “парковка”га айлантирилди. Бугун Тошкентда тадбиркорларнинг норозилиги ортяпти, улар синдириляпти. Умуман айтганда, Тошкент бугунгичалик қонунсизликни, бугунгичалик ёмон муҳитни кўрмаган. Мана ҳақиқий фожиа, ҳақиқий трагедия мана шу. Яъни, мана шундай гапларни айтаётган, битта дарахт кесишдан трагедия ясаманглар деб айтаётган одамнинг ўзи ҳоким эканлиги ҳақиқий трагедия”, деб айтган Кушербоев. 

Экоқўмита раиси маслаҳатчиси ўз муносабатида Тошкент шаҳрининг Яккасарой туманида яқинда содир бўлган “экотеррор” ҳолатини ҳам келтириб, унга ҳокимликни асл айбдор сифатида санаган. 

Унинг сўзларига кўра, ҳокимлик ва ҳоким Умурзоқов мансаби сабаб содир этилган қонунбузарлик жавобгарлигидан қутулиб қолмоқда. 

“Яқиндагина Яккасаройдаги 174 та кўкариб турган дарахтни кесиб ташланишида бош бўлган одамларни, мана шу ҳокимликни бошида турган одамни бундай гапириши, умуман, сўз бошқа – иш бошқа деган гапни англатади. Қизиғи, мана шу кесилган дарахтлар бўйича ҳам жавобгарликдан мансаби бўлганлиги учун қутилиб қолинди-да. Бунга оддий ободонлаштириш ходимлари жавобгар қилиняпти. Прокуратура афсус бу бўйича маълумотларни ҳали очиқламади”, деб таъкидлаган экофаол. 

Яккасаройдаги “экотерроризм” 

Аввалроқ, Тошкентнинг Яккасарой туманида 144 туп дарахт мораторий талабларига зид равишда кесиб ташлангани ҳақида Расул Кушербоевнинг ўзи хабар қилган эди. Дастлабки ўрганишларда Яккасарой туманининг Нукус кўчаси ва Бобур кўчаси кесишмасидан бошлаб, Бобур кўчаси бўйлаб автомобиль йўли ёнидаги жами 144 туп дарахт (можжевельник) кесиб кетилгани аниқланганди. Кейинчалик, бу нест-нобуд бўлган дарахтларнинг адади 174 тага етгани маълум қилинганди. 

Мазкур ҳолат юзасидан Экология инспектори томонидан тегишли тартибда баённомалар расмийлаштирилиб, жами 1 миллиард 460 миллион 952 минг сўм зарар ҳисоблангани хабар қилинган эди.

“Бугун экологиянинг душмани – ҳокимиятлар. Тошкент шаҳрида экологик вазиятнинг ёмонлашишига Тошкент шаҳар ҳокимияти айбдор. Улар кестиртиряпти. Улар расво қиляпти”, деган эди ўша вақтдаги ўз видеомурожаатида Экология ва иқлим ўзгариши миллий қўмитаси раис маслаҳатчиси Расул Кушербоев. 

Ўша вақтдаги гувоҳларнинг сўзларига кўра, дарахтлар Тошкент шаҳар ҳокими ўринбосари Бахтиёр Раҳмоновнинг ўсиб турган дарахтлар ўрнига бошқа дарахтлар экиш тўғрисидаги топшириғига биноан, ободонлаштириш бошқармаси томонидан тунги вақтда кесиб ташланган.