Асад ҳокимиятидан сўнг Сурия янги парламенти илк йиғилишини ўтказди (видео)

Суриянинг янги парламенти 12 июль куни Дамашқда илк йиғилишини ўтказди. Мазкур ҳолат Президент Аҳмад аш-Шараа бошчилигидаги исёнчилар Башар Асад ҳокимиятини ағдарганидан 19 ой ўтиб мамлакат сиёсий ўтиш жараёнидаги муҳим босқич бўлди. Бу ҳақда “Reuters” хабар берди.

Маълум қилинишича, Президент Аҳмад аш-Шараа парламентда сўзга чиқиб, депутатларни “ушбу кенгашни масъулият ва салоҳият намунасига айлантиришга” чақирган ҳамда парламентни “ҳақиқат ва адолат минбари” деб атаган.

“Сурия ўз қаҳрамонлигини акс эттирувчи шарафли тарихни ёзмоқда ва биз мамлакат ҳамда инсонни барпо этиш масъулиятига эгамиз”, деган у.

Янги парламент Аш-Шараанинг ўнлаб йиллар давомида Асадлар оиласи полициявий давлат сифатида бошқарган Сурияда инклюзив сиёсий тизим барпо этиш ҳақидаги ваъдасининг синови сифатида баҳоланмоқда. Илгариги парламент эса ҳокимият қарорларини расман тасдиқловчи орган сифатида кўрилган.

Мамлакатнинг ўтиш даври бошқарув тизимига кўра, 210 ўринли парламентнинг учдан икки қисми ўтган йили ҳудудий сайлов коллегиялари томонидан шакллантирилган. Қолган учдан бир қисмини эса Аш-Шараа 1 июль куни тайинлаган.

Расмийлар бу тизимни йиллар давом этган уруш миллионлаб одамларни кўчишга мажбур қилгани, аҳоли ва сайловчилар ҳақидаги аниқ маълумотлар мавжуд эмаслиги билан изоҳлаган. Танқидчилар эса мазкур тартиб ижро ҳокимиятига депутатларни танлаш жараёни устидан жуда катта назорат берганини айтмоқда. Аш-Шараа инфратузилма тикланиб, ҳужжатлаштириш тизими йўлга қўйилганидан кейин умумий сайловлар ўтказилишини қўллаб-қувватлашини билдирган. 

Қайд этилишича, парламент қонунларни таклиф қилиш ва қабул қилиш ҳуқуқига эга. Унинг ваколат муддати 30 ой бўлиб, узайтирилиши мумкин. Доимий конституция қабул қилиниб, сайловлар ўтказилгунига қадар қонун чиқарувчи ҳокимият вазифасини бажаради. Конституциявий декларацияни тайёрлаган қўмита аъзоси Абдул Ҳалим ал-Авак 99 овоз билан парламент спикери этиб сайланган. Аш-Шараанинг айтишича, парламент янги конституция лойиҳасини ишлаб чиқувчи қўмитани шакллантириш вазифасини ҳам бажаради.

Манбага кўра, парламент таркибида 21 нафар аёл депутат бор. Уларнинг 15 нафари Аш-Шараа томонидан тайинланган депутатлар ҳисобланади. Расмийлар этник ва диний озчилик вакиллари нечта ўрин олгани ҳақида расмий маълумот эълон қилмаган. Норасмий ҳисоб-китобларга кўра, ўтган йили сайланган депутатлар орасида 10 ўрин курдлар, насронийлар ва алавийлар каби этник ва диний озчилик вакилларига тегишли.

Эслатиб ўтамиз, Франция Президенти Эммануэль Макрон ҳам 6 июль куни Сурияга ташриф буюрган эди. Бу 2024 йилда Президент Аҳмад аш-Шараа бошчилигидаги исёнчилар Башар Асад ҳокимиятини ағдарганидан буён Европа Иттифоқи давлат раҳбарининг Дамашққа илк ташрифи бўлганди.