“Arqadag‘” qizini Ozarbayjonga ham olib bordi

Turkman xalqining milliy yetakchisi, Turkmaniston Xalq Maslahati raisi Gurbanguli Berdimuhamedov bugun, 16 iyul kuni Ozarbayjon Respublikasiga bordi. Bu haqda “Azertac” xabar berdi.

Ikki mamlakat davlat bayroqlari hilpirab turgan Bakudagi Haydar Aliyev nomli xalqaro aeroportda mehmon sharafiga faxriy qorovul saf tortdi. Turkmaniston Xalq Maslahati raisini Ozarbayjon Bosh vazirining birinchi o‘rinbosari Yoqub Ayubov, Tashqi ishlar vaziri o‘rinbosari Samir Sharifov va boshqa rasmiy shaxslar kutib oldi.

Bugun, 16 iyul kuni Ozarbayjon Prezidenti Ilhom Aliyevning Turkmaniston Prezidenti Gurbanguli Berdimuhamedov bilan yakkama-yakka uchrashuvi ham bo‘lib o‘tdi.

“Turkmaniston va Ozarbayjon tashqi siyosat sohasida BMT Nizomi va tan olingan xalqaro-huquqiy me’yorlarga amal qilgan holda prinsipial va qat’iy pozitsiyani egallaydi. Mamlakatlarimiz jahon va qit’ada, mintaqaviy masalalarda, Kaspiy dengizi hududida barqarorlik va xavfsizlikni ta’minlashga salmoqli hissa qo‘shmoqda.

Biz eng yirik xalqaro tashkilotlar, birinchi navbatda, BMT va qator mintaqaviy tuzilmalarda muvaffaqiyatli va samarali hamkorlik qilmoqdamiz. Shu munosabat bilan Xonkendi shahrida Iqtisodiy hamkorlik tashkilotiga a’zo davlatlarning 17-sammiti muvaffaqiyatli o‘tgani bilan Ozarbayjonni tabriklayman”, dedi Berdimuhammedov.

Shuningdek, Gurbanguli Berdimuhamedov bilan berga uning to‘ng‘ich qizi, Gurbanguli Berdimuhamedov nomidagi Qarovga muhtoj bolalarga ko‘maklashish xayriya jamg‘armasining tibbiy faoliyat bo‘yicha vitse-prezidenti Oguljahon Otaboyeva ham Bakuda bo‘lib turibdi. U Ilhom Aliyevning to‘ng‘ich qizi, Haydar Aliyev fondi vitse-prezidenti Leyla Aliyeva bilan uchrashdi.

Eslatib o‘tamiz, aprel oyida Gurbanguli Berdimuhamedov O‘zbekistonga kelganida o‘sha paytdagi Prezident yordamchisi Saida Mirziyoyeva Oguljahon Otaboyeva bilan Samarqand shahrini sayr qilgandi.