АПЛнинг энг тезкор футболчилари маълум қилинди

Англиянинг “Ливерпуль” клуби ҳужумчиси Дарвин Нуньес Премьер лиганинг 2022-2023 йилги мавсумидаги энг тезкор футболчи бўлиб турибди. Уругвайлик ҳужумчининг тезлиги соатига 36,5 кмни ташкил қилади. Бу ҳақда “Goal” нашри ёзмоқда.

Дарвин Нуньес “қизиллар”нинг “Фулхэм”га қарши учрашувида соатига 36,5 км тезликда югурган. Ҳа, Дарвиннинг Премьер лигага  мослашиши осон кечмаяпти, аммо тезлик борасида уругвайлик ҳужумчи муаммога дуч келмаяпти.

Иккинчи ўринга “Арсенал” ҳужумчиси Габриэл Мартинелли жойлашган. Бразилиялик футболчи “тўпчилар”нинг ушбу мавсумда АПЛ жадвалида 1-ўринда туришига катта ҳисса қўшмоқда.

Кучли учликка “Манчестер Юнайтед” ҳимоячиси Диогу Далот якун ясаб берган. Португалияликнинг тезлиги соатига 35,8 кмгача чиққан. Қайд этиш керакки, Даллот жорий мавсумда ўйини ва тезлигини анча ривожлантирди.

“Ньюкасл” футболчиси Аллан Сен-Максимен соатига 35,7 км тезликкача чиққан. Шунингдек, "Борнмут" аъзоси Жек Стейси соатига 35,6 км тезлик қайд этган.

Жорий мавсумда мухлисларни ҳайртага солаётган “Манчестер Сити” ҳужумчиси Эрлинг Холанд тезлик борасида юқоридаги футболчилар билан баҳслаша олмаган.

Ўтган мавсумда Муҳаммад Салоҳ, Антонио Рюдигер ва Адама Траоре каби футболчилар тезлик борасида бошқалардан юқорироқ натижа қайд этган. 2019-2020 йилги мавсумда Кайл Уокер АПЛнинг энг тезкор футболчиси бўлган. Ўшанда “Манчестер Сити” ҳимоячиси соатига 37,8 км тезликка чиққан.

Маълумки, футболчилар қисқа масофага юқори тезликда югуришлари керак бўлади. Уларнинг натижалари бошқа спорт билан солиштиргандан унчалик ёмон эмас.

Саккиз карра Олимпиада чемпиони Усейн Болт 2009 йилда 100 метрни 9,58 сонияда босиб ўтган. Яъни, ямайкалик атлет тезлигини 44,72 кмгача ошира олган. 100 метрга югуриш бўйича 2020 йилги Олимпида чемпиони Марсель Жейкобс 43,06 км тезлик қайд этган. Ўша Олимпиданинг кумуш медали соҳиби Фред Керли 42,8 км тезликда югурган. Ҳа, уларнинг тезлиги футболчиларнинг тезлигидан сезиларли даражада юқори. Лекин Болт ва бошқалар айнан тезлик биринчи рақамли фазилат бўлган спорт билан шуғулланади. Футболчи учун эса бошқа муҳим факторлар ҳам мавжуд.

Футболчилар американча футбол вакилларига тезлик борасида дарс ўта олишади. Американча футболда 2022 йил учун энг катта тезликни “Балтимор Рэйвенс” вакили Девин Дюверней қайд этган. У 34,7 км тезлик билан NFL’нинг энг тезкор ўйиничиси бўлиб турибди. Девиннинг тезлиги АПЛдаги энг тезкор футболчи Дарвин Нуньеснинг тезлигидан 1,8 кмга секинроқдир.