APLning eng tezkor futbolchilari ma’lum qilindi

Angliyaning “Liverpul” klubi hujumchisi Darvin Nunes Premer liganing 2022-2023 yilgi mavsumidagi eng tezkor futbolchi bo‘lib turibdi. Urugvaylik hujumchining tezligi soatiga 36,5 kmni tashkil qiladi. Bu haqda “Goal” nashri yozmoqda.

Darvin Nunes “qizillar”ning “Fulxem”ga qarshi uchrashuvida soatiga 36,5 km tezlikda yugurgan. Ha, Darvinning Premer ligaga  moslashishi oson kechmayapti, ammo tezlik borasida urugvaylik hujumchi muammoga duch kelmayapti.

Ikkinchi o‘ringa “Arsenal” hujumchisi Gabriel Martinelli joylashgan. Braziliyalik futbolchi “to‘pchilar”ning ushbu mavsumda APL jadvalida 1-o‘rinda turishiga katta hissa qo‘shmoqda.

Kuchli uchlikka “Manchester Yunayted” himoyachisi Diogu Dalot yakun yasab bergan. Portugaliyalikning tezligi soatiga 35,8 kmgacha chiqqan. Qayd etish kerakki, Dallot joriy mavsumda o‘yini va tezligini ancha rivojlantirdi.

“Nyukasl” futbolchisi Allan Sen-Maksimen soatiga 35,7 km tezlikkacha chiqqan. Shuningdek, "Bornmut" a’zosi Jek Steysi soatiga 35,6 km tezlik qayd etgan.

Joriy mavsumda muxlislarni hayrtaga solayotgan “Manchester Siti” hujumchisi Erling Xoland tezlik borasida yuqoridagi futbolchilar bilan bahslasha olmagan.

O‘tgan mavsumda Muhammad Saloh, Antonio Ryudiger va Adama Traore kabi futbolchilar tezlik borasida boshqalardan yuqoriroq natija qayd etgan. 2019-2020 yilgi mavsumda Kayl Uoker APLning eng tezkor futbolchisi bo‘lgan. O‘shanda “Manchester Siti” himoyachisi soatiga 37,8 km tezlikka chiqqan.

Ma’lumki, futbolchilar qisqa masofaga yuqori tezlikda yugurishlari kerak bo‘ladi. Ularning natijalari boshqa sport bilan solishtirgandan unchalik yomon emas.

Sakkiz karra Olimpiada chempioni Useyn Bolt 2009 yilda 100 metrni 9,58 soniyada bosib o‘tgan. Ya’ni, yamaykalik atlet tezligini 44,72 kmgacha oshira olgan. 100 metrga yugurish bo‘yicha 2020 yilgi Olimpida chempioni Marsel Jeykobs 43,06 km tezlik qayd etgan. O‘sha Olimpidaning kumush medali sohibi Fred Kerli 42,8 km tezlikda yugurgan. Ha, ularning tezligi futbolchilarning tezligidan sezilarli darajada yuqori. Lekin Bolt va boshqalar aynan tezlik birinchi raqamli fazilat bo‘lgan sport bilan shug‘ullanadi. Futbolchi uchun esa boshqa muhim faktorlar ham mavjud.

Futbolchilar amerikancha futbol vakillariga tezlik borasida dars o‘ta olishadi. Amerikancha futbolda 2022 yil uchun eng katta tezlikni “Baltimor Reyvens” vakili Devin Dyuverney qayd etgan. U 34,7 km tezlik bilan NFL’ning eng tezkor o‘yinichisi bo‘lib turibdi. Devinning tezligi APLdagi eng tezkor futbolchi Darvin Nunesning tezligidan 1,8 kmga sekinroqdir.