АПЛ ўйинларини Россияда трансляция қилиш тақиқланди

Англия Премьер лигаси шартнома шартларини  биртомонлама бузган ҳолда, “Оkkо” билан келишувни тўхтатишга қарор қилди. Бироқ бу мутлақо сиёсий сабабларга асосланади. Бу ҳақда Россиянинг “Оkkо” онлайн канали баёнотида сўз борган

“Англия Премьер лигаси амалдаги шартнома шартларини бузган ҳолда, бир томонлама кўринишда “Оkkо” билан муносабатларни узишга қарор қилди. Бу позиция фақат сиёсий мотивларга асосланади. “Окко” ўз навбатида амалдаги шартноманинг барча шартларини бажарди. “Оkkо” россиялик футбол мухлисларига Англия Премьер лигаси ўйинларини кўрсата олмаслигидан афсусда”, дейилган “Оkkо” баёнотида.

Маълумот ўрнида, АПЛ Россияда ўйинларини трансляция қилишни тақиқлаб, Украина халқини қўллаб-қувватлаш учун пул ажратганди. Бундан ташқари, Англия клублари АПЛнинг деярли ҳар-бир учрашувда урушдан жабрланаётган украинлар билан бирга эканликларини билдиришмоқда.

Россия спортига киритилган чекловлар 

Рус қўшинлари Украинага киргач, Халқаро дзюдо федерацияси (ХДФ) Россия Президенти Владимир Путинни ташкилот фахрий президенти ва элчиси мақомидан маҳрум қилди. 

Польша, Чехия ва Швеция футбол терма жамоаси Жаҳон чемпионатига саралаш доирасида Россия билан ўйинга боришдан бош тортди.

Европа футбол уюшмалари иттифоқи (UEFA) 2022 йилги Европа Чемпионлар лигаси финали Санкт-Петербург шаҳридан Парижга кўчирилганини маълум қилди.

FIFA  ҳамда UEFA Россия терма жамоалари ва клубларини барча футбол мусобақаларидан чиқариб ташлади.

Халқаро баскетбол федерацияси россиялик баскетболчилар ва расмий шахсларни ташкилот шафелигидаги барча мусобақаларда иштирок этишдан четлаштирди.

Дунёдаги энг йирик спорт кийимлари компанияси “Аdidas” Россия футбол жамоалари билан ҳамкорликни тўхтатганини маълум қилди. Шунингдек, Германиянинг "Шальке 04" клуби ва UEFA'нинг ўзи ҳам Россиянинг "Газпром" трансмиллий компанияси билан ҳамкорликни тўхтатди.

Халқаро Паралимпия қўмитаси (IPC) россиялик ва беларуслик атлетларни Пекин-2022 Паралимпия ўйинларидан четлатди.

Шунингдек, 2023 йилда Россиянинг Қозон шаҳрида бўлиб ўтадиган Махсус Олимпиада ўйинлари бекор қилинди.

Маъруф Абдумаликов