Англия Премьер лигаси тарихидаги энг яхши тўпурарлар эълон қилинди

Англия терма жамоаси ва “Ньюкасл” клубининг собиқ футболчиси Алан Ширер Англия Премьер лигаси тарихидаги энг яхши тўпурар ҳисобланади. Ширернинг ҳисобида 260 та гол мавжуд. Бу ҳақда “Goal” нашри ёзмоқда.

Иккинчи поғонага Уэйн Руни жойлашган. “Манчестер Юнайтед”нинг собиқ футболчиси Премьер лигада 208 та гол уришга эришган.

Кучли учликка Харри Кейн якун ясаб берган. “Тоттенхэм” футболчиси ҳозиргача 193 та гол урган. Ширер ва Рунидан фарқли равишда Кейн айни дамда ҳам футбол ўйнамоқда. 29 ёшли ҳужумчи уч-тўрт мавсум стабил гол урадиган бўлса, АПЛ тарихидаги энг яхши голеадорга айланиши мумкин.

АПЛ тарихидаги энг яхши 10 нафар тўпурар билан танишинг:

1. Алан Ширер 260 та гол (қайси жамоалар таркибида урган: “Ньюкасл”, “Блэкбрен”);

2. Уэйн Руни 208 та гол (“Манчестер Юнайтед”, “Эвертон”);

3. Харри Кейн 193 та гол (“Тоттенхэм”);

4. Энди Коул 187 та гол (“Ньюкасл”, “Манчестер Юнайтед”, “Блэкбрен”, “Фулхэм”, “Манчестер Сити”, “Портсмут”);

5. Серхио Агуэро 184 та гол (“Манчестер Сити”);

6. Фрэнк Лэмпард 177 та гол (“Вест Хэм Юнайтед”, “Челси”, “Манчестер Сити”);

7. Тьерри Анри 175 та гол (“Арсенал”);

8. Робби Фаулер 163 та гол (“Ливерпуль”, “Лидс”, “Манчестер Сити”);

9. Жермейн Дефо 162 та гол (“Вест Хэм Юнайтед”, “Тоттенхэм”, “Сандерленд”, “Портсмут”, “Борнмут”);

10. Майкл Оуэн 150 та гол (“Ливерпуль”, “Ньюкасл”, “Манчестер Юнайтед”, “Сток Сити”).

Юқоридаги ўнликни қўшиб ҳисоблаганда, Англия Премьер лигаси тарихида 32 нафар футболчи 100 тадан кўп гол урган. Фақатгина юқоридаги 10 нафар футболчи 150 та ёки ундан кўпроқ гол киритишга эришган. Уларнинг энг яқин таъқибчиси Жейми Варди ҳисобланади. Варди АПЛда ҳаммаси бўлиб, 133 та гол киритган.

“Ливерпуль”нинг мисрлик ҳужумчиси Муҳаммад Салоҳ АПЛда 123 та гол киритиб, афсонавий Стивен Жерардни ортда қолдирди. “Қизиллар”нинг собиқ футболчиси Премьер лигада 120 та гол урган эди. Шунингдек, Салоҳ АПЛдаги африкалик энг яхши тўпурар ҳисобланади. Ундан кейинги ўринларда Садио Мане ва Дидье Дрогба бормоқда.
 
Алан Ширерга 100 та гол уриш учун 124 та ўйин керак бўлган. Бошқа ҳамма футболчи 100 та гол уриш учун Ширердан кўпроқ ўйин ўтказган. Харри Кейнга 100 та гол уриш учун 141 та ўйин кетган.

АПЛда 100 та гол уришга эришган 32 та футболчидан 6 нафари пенальтидан битта ҳам гол урмаган. Булар: Садио Мане, Энди Коул, Питер Крауч, Эмиль Хески, Лес Фердинанд ва Райан Гиггздир.

Шунингдек, фаолиятининг катта қисмини АПЛдан бошқа чемпионатда ўтказган Криштиану Роналду ҳам 100 талик довонни забт этган. Унинг ҳисобида 103 та гол мавжуд.

Маълумот учун, АПЛнинг жорий мавсумида “Манчестер Сити” футболчиси Эрлинг Холанд яққол тўпурар бўлиб турибди. Унинг ҳисобида 17 та гол мавжуд ва бу атиги 11 та ўйинда киритилган. Мавсум якунланишига яна 27 тур бор. АПЛда бир мавсумда гол уриш бўйича энг яхши натижа 34 тани ташкил қилади. Жароҳат ёки бошқа омиллар халақит бермаса, Холанд ушбу рекордни уриши деярли аниқ бўлиб турибди.