Андижонда 100 минг доллар кредит олиб беришни ваъда қилган фуқаро ушланди

Андижон вилоятида танишлари орқали 100 минг доллар миқдорида кредит ажратиб беришни ваъда қилган фуқаро қўлга тушди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум қилинишича, Хоразм ва Андижон вилоятларида ноқонуний йўллар билан имтиёзли кредит олиб беришни ваъда қилган шахсларга қарши тадбир уюштирилиб, улар қўлга олинган.

Хусусан, Хоразм вилоятининг Ҳазорасп туманидаги тадбирда фуқаро Т.Ж. бошқа бир фуқаро О.Б.нинг ишончига кириб, унга гўёки Хоразм вилояти тижорат банкларида ишловчи танишлари орқали 1,5 млрд сўм имтиёзли кредит ажратилишида ёрдам бериши эвазига 150 млн сўм пулни олган вақтида ашёвий далиллар билан ушланган.

Қолаверса, Андижон вилоятида ўтказилган тезкор тадбирда ҳам фуқаро У.О. бошқа бир фуқаро Б.М.га гўёки Андижон шаҳар банк хизматлари марказида ишловчи танишлари орқали 3 минг доллар эвазига 100 минг АҚШ доллари миқдорида кредит ажратиб беришини айтиб, шундан 1 000 долларини олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

Эслатиб ўтамиз, аввалроқ Хоразм ва Қашқадарё вилоятларида ички ишлар органларига ишга киритиб қўймоқчи бўлган шахслар қўлга тушганди.