Андижон ўз тарихида илк бор Ўзбекистон кубогини қўлга киритди

Фарғонадаги Истиқлол стадионида ўтказилган Ўзбекистон Кубоги-2024 финалида “Андижон” жамоаси Наманганнинг “Навбаҳор” жамоасини камбэк эвазига мағлуб этиб, кубок эгаси бўлди.

Ўйиннинг 1-таймида жамоалар гол киритмади ва бўлим 0:0 ҳисобида якунланди.

Иккинчи бўлимнинг 8-дақиқасида наманганликлар вакили Аброр Исмоилов ҳисобни очди. Ўйиннинг асосий вақти якунланишига 8 дақиқа қолганда Андижон аъзоси Муҳаммадкарим Тоиров мувозанатни тиклади. Шу тариқа жамоалар экстра-таймларга йўл олди.

Қўшимча бўлимларнинг биринчисида жамоалар 1:1 ҳисобини ушлаб қолди.

Экстра-таймларнинг иккинчиси драматик тарзда ўтди. Дастлаб, 116-дақиқада андижонликлар вакили Ислом Маматказин жамоасини ҳисобда олдинга олиб чиқди. Орадан 3 дақиқа ўтиб, “лочинлар” аъзоси Фарруҳ Сайфиев гол  киритиб, мувозанатни тиклади. Ўйиннинг сўнгги дақиқасида “бургутлар“ вакили Владимир Бубаня “Навбаҳор” дарвозасини ишғол қилиб, жамоаси ғалабасини таъминлади. Якуний ҳисоб – 2:3. Шу тариқа “Андижон” ўз тарихида илк бор Ўзбекистон кубогини қўлга киритди.